Des en Dawn Lindberg
FOTO: verskaf

Des en Dawn Lindberg FOTO: verskaf

Het jy gehoor?

Des & Dawn Lindberg se Nelson-lied vir Madiba

Des en Dawn Lindberg se “The Seagull’s Name was Nelson” was in 1971 vir 20 weke nommer een in SA. Só het die lied sensuur vrygespring.

Die oomblik toe Des en Dawn die lied, wat oorspronklik deur die Britse musikant Peter Bennet geskryf is, gehoor het, het hulle geweet hulle wil dit sing.

Die lied gaan oorspronklik oor ’n seemeeu wat ná ’n olie-lek deur die swaar en smerige stof bedek is en daarom nie meer kon vlieg nie – en dus nie vry was nie. “Maar ons het besluit om dit op te neem omdat daar so ’n sterk konneksie met Madiba was. Hy was ook nie meer vry om te vlieg nie,” vertel Dawn oor die oudpresident wat in daardie stadium in die tronk op Robbeneiland was.

Omdat die lied se verband met Madiba nie so direk was nie, het dit die sensuurwette van die dag vrygespring. Dié week het Sunday Times “The Seagull’s Name was Nelson” aangewys as een van die 100 beste Suid-Afrikaanse liedere.

“Toe Madiba in 1992 vrygelaat is, het ons die lied herskryf sodat dit gaan oor hom en sy tyd in die tronk,” het sy vertel. Dit is dié weergawe wat die getroude paartjie vir Madiba en oudpresident F.W. de Klerk gesing het toe hulle aangewys is as nuusmakers van die jaar.

“Ek onthou nog dat ek saam met Madiba gedans het. Hy was mal oor die lied,” herroep sy.

Dawn verduidelik dat die gevangenes op Robbeneiland ’n radio in die hande gekry het in die tyd wat “The Seagull’s Name was Nelson” uitgereik is. “Hy het glo elke keer wat die lied gespeel het vir mense gesê ‘dis my lied’ en ‘hulle sing oor my’,” vertel sy.

Volgende jaar sal Dawn en haar man, Des, se 50ste jaar in die vermaaklikheidsbedryf én as getroudes wees.”Ek dink nie daar is nog ’n getroude paartjie wat al so lank in die bedryf is nie,” sê sy.

Ter viering daarvan gaan die paartjie ’n boek uitreik wat die storie van hul familie en hul vennootskap vertel.

Luister hier na Dawn en Des se lied.