Suzaan Heyns
Het jy gehoor?

EKSKLUSIEF: Ontwerper Suzaan Heyns se eie trourok

Ooit gewonder hoe ’n ontwerper se eie trourok sal lyk? Die bekende Suid-Afrikaanse ontwerper Suzaan Heyns (34) is op 28 November verlede jaar getroud met die liefde van haar lewe, Willem Kitshoff (34), ʼn grafiese ontwerper van Johannesburg. En sy het uiteraard een van haar eie ontwerpe gedra.

Suzaan het die aktrise Rolanda Marais se asemrowende trourok van onder meer chantilly-kant ontwerp. Rolanda en Jozua Malherbe deel hul troue eksklusief in die April-uitgawe van SARIE.

Haar eie trourok

Die rok is van verskeie soorte satyn gemaak. Die ontwerp het ʼn sterk struktuur, wat geïnspireer is deur die Chrysler-gebou in New York, VSA.  Die vyf meter lange sluier van tulle- en satynpanele is in ’n art deco-styl.

Haar ruiker was ʼn enkele blom, nie vars nie, maar ’n beeldhouwerk deur die Suid-Afrikaanse kunstenaar Sybrand Wiechers.

FOTO: Pieter Vosloo

FOTO: Pieter Vosloo

FOTO: Pieter Vosloo

FOTO: Pieter Vosloo

FOTO: Pieter Vosloo

FOTO: Pieter Vosloo

FOTO: Verskaf

Suzaan en Willem se liefde strek oor ’n leeftyd. Dié twee is al maats vandat hulle saam in graad een aan die Laerskool Fountainebleau in Johannesburg was. Op hoërskool het hulle ná skool saam huis toe gestap. Toe hulle 20 jaar oud was, het hulle besef hulle is eintlik nog al die tyd méér as net beste vriende.

“Ons was bang ons gaan ons vriendskap belemmer as ons ’n romantiese verhouding het. Maar toe besef ons ons is nie net beste vriende nie, ons is verlief op mekaar,” het Suzaan aan Fanie Cronjé vertel.

Suzaan en Willem is op die Prynnsberg-landgoed naby Clocolan in die Oos-Vrystaat getroud. Hul huwelik is bygewoon deur 60 gaste van naaste familie en beste vriende.

Vir die onthaal het Suzaan uitskot-stukke by die Ceramic Factory gekry en brood daarin laat bak. Die gaste kon toe die brood daaruit breek.

“Ons het almal saam brood gebreek”, het Suzaan gesê.

FOTOGRAAF Pieter Vosloo | HARE Stoffel van Wyk van Foil Styling | GRIMERING Michelle-Lee Collins | VENUE Prynnsberg Estate in Clocolan | ROK Suzaan Heyns | RUIKER Sybrand Wiechers

Sien hoe pragtig het Rolanda Marais in haar Suzaan Heyns-trourok gelyk, eksklusief in jou April-uitgawe van SARIE. Nóú te koop.

APR april 2016 Rolanda Marais

Lees nou