Ons praat met

Jason Hartman van Idols

Hy’s heelwat ouer as die meeste Idols-deelnemers, maar dis nie nét ondervinding wat in die 29-jarige Jason Hartman se guns tel nie –
hy’s gedrewe én baie talentvol. Dié kalant van ’n bye- en perdeplaas in KwaZulu-Natal kan sing én perform.

Wat verg dit om Idols te wen?
Konstantheid, oorspronklikheid, dissipline en eerlikheid. Wees jouself.

Stem mense vir die liedjie of vir die optrede?
’n Bietjie van alles. Die liedjie is gewoonlik baie belangrik. Maar die performance is deurslaggewend.

Sê nou jy kry nooit daai trefferliedjie waarvan almal hou nie. Hoe werk ’n loopbaan as sanger dan?
Daar is 2 soorte sangers. Die klomp wat kommersiële sukses het, en dié wat dit nié het nie. Jy soek egter daai hit song!

En waar op aarde kry jy dit?
Ek is ’n liedjieskrywer. Ek weet nie waar hulle vandaan kom nie, maar dis van ’n baie spesiale plek af.

Daardie spesiale plek sit seker op ’n baie spesifieke plek, omdat dit so moeilik te kry is!
Baie moeilik. As dit maklik was, was dit ’n piece of cake om dit in die musiekwêreld te maak.

Wie is vir jou die werklike Idol?
Heinz Winckler, die oorspronklike Idol. Ek het ook van Ezra gehou. Ek wonder wat van hom geword het . . .

Hy doen nog die rondtes in die Kaap.
Dis goed. Jody doen ook goed, en Jacques Terreblanche.

Ek glo jou naam gaan ook op daardie lys verskyn.
Baie dankie. Dis ’n mooi kompliment.

Én jy lyk soos Heath Ledger.
Ek het dit al gehoor, veral toe my hare lank en bosserig was.