Joshua na die Reën en Anán
FOTO: Willem Lourens
STILERING: Danny Toüa

Joshua na die Reën en Anán FOTO: Willem Lourens STILERING: Danny Toüa

Ons praat met

Joshua na die Reën oor klein Anán: ‘Ons het min antwoorde, maar baie vrae’

As negejarige het hy reeds al die pryse op kunswedstryde gekry. In 2010 het Joshua na die Reën (hy verkies sy verhoognaam) as top-jazz-student  ’n BTech-graad aan die Tshwane- Universiteit van Tegnologie in Pretoria verwerf. Hy was toe sowat ’n jaar lank pianis en agtergrondsanger vir Jak de Priester en daarna vir Bobby van Jaarsveld.

Maar in 2013 was hy gereed vir sy solo-loopbaan en sy debuut-CD, Joshua na die reën. In 2014 is hy bekroon met die Huisgenoot Tempo- toekenning as nuweling van die jaar. Hy het ook twee Ghoemas as nuweling van die jaar en vir beste manlike kontemporêre album van die jaar gekry. Vandat hy pa is, dink hy heel anders oor die lewe.

“Anán se liedjie” verskyn glo op jou nuwe album wat in September uitgereik word …

Ek het dit verlede Augustus geskryf. Só lui die eerste versie:

Wag vir my waar die wind waai
Speel tussen die lig waar die seisoen draai                                    
En al vlieg jy soms alleen, maak jou hart oop, laat dit reën
As jy huis toe verlang … vat die pad wat huis toe gaan

 

Vertel hoe jy al haar “eerstes” sover beleef het?

Om haar die eerste keer te sien was ongelooflik … om haar vas te hou
was baie spesiaal. Sy was nege maande binne-in Danél, hulle was aan mekaar verweef, maar toe kon ék haar skielik ook voel. Die eerste keer toe haar
ogies oopgegaan het, toe sy gehuil het, daardie glimlag, die eerste hardop lag en die voet in die mond. Die lys is lank …

Wat het sy jou tot dusver geleer?

Dat ons eintlik geen antwoorde het nie, maar vrek baie vrae. En dat dit oukei is. En dat ek die vermoë het om onvoorwaardelik lief te hê, veel meer as wat ek ooit kon droom.

Hoe inspireer sy jou om ’n beter mens te wees?

Ons is so geneig om te bly vaskyk in dit wat net die blote oog kan sien. Jy dink dalk: Hoe kan ’n ou piepklein babatjie nou jou lewe verander? Maar dan kyk ek hoe Anán mense se lewe verander. Sy laat mense lag wat vroeër nog nooit eens geglimlag het nie. Ek glo sy sal op haar unieke manier ’n uitsonderlike pad stap vir solank as wat sy moet. Anán beteken “vanuit die wolk” in Arabies.