FOTO Leana Clunies-Ross

Ons praat met

Olivia, ma Diaan Lawrenson se “ou siel in ’n klein lyfie”

In Mei verlede jaar het aktrise Diaan Lawrenson vir Johannesburg en 7de Laan gegroet. Nou het sy en haar man, Jody Abrahams, en hul kinders, Olivia Rose (6) en Thomas (3), hul Kaapse voete gevind.

Diaan gesels met ons hieroor in die Februarie-uitgawe van SARIE, wat nog tot Sondag 19 Februarie te koop is.

Hier volg ’n kort uittreksel oor Olivia se wyse raad aan haar ouers en die belangrikste les wat Diaan haar wil leer … 

Olivia was die minste van haar ma se bekommernis met die groot trek Kaap toe. ’n Flambojante kind, vol selfvertroue, spraaksaam; nes haar pa.

Maar toe onverwags ontroosbaar oor wat sy moes agterlaat. Dae lank het sy net gelê, nie geëet nie. Een wintersdag in die Kaap het Olivia gehuil asof haar hart wil breek.

“Sy’s ’n ou siel in ’n klein lyfie. Sy vat haar eie tyd om goed te prosesseer,” sê Diaan nou.

Vir Olivia het die keerpunt ná ’n kuier van twee weke in Johannesburg gekom. Sy het meer van Diaan se vriende gesien as haar ma self en al haar oumas en oupas. Vir Olivia het alles toe in plek geval.

“Ek dink nie sy het voorheen verstaan hulle is steeds daar nie. Vir haar was dit so goed hulle is dood, nie meer deel van haar lewe nie.”

“Soms het jy perspektief nodig, dis maar met almal so.”

FOTO Leana Clunies-Ross

FOTO Leana Clunies-Ross

Dit was Olivia wat haar ouers aangepor het om in 2014 te trou. Sy wou aanmekaar weet hoekom is Diaan dan Lawrenson en die res van die gesin Abrahams? Nou sê sy met duidelike genot: “Ons is álmal Abrahams.” Diaan werk onder haar nooiensvan, maar is amptelik Abrahams.

Voor hul huwelik het die twee ’n huweliksberader besoek. By die berader het Diaan ’n belangrike lewensles geleer. Een aand het hulle soesji gaan eet, ’n ervaring wat sy graag vir haar kinders wou gee. Die geld was skraps en sy het nie saamgeëet nie. Toe hulle oor geld praat, het sy die storie aan die berader vertel. Dis nie reg nie, het hy gesê. “Ek was ontsteld. ‘Verskoon my, ek wil net die beste vir my kinders gee.’ En sy antwoord: ‘Weet jy wat jy hulle leer? Dat jy ’n vloermat is.’”

Dis iets waaroor sy baie dink.

Sy voel sterk dat haar Olivia ’n vrou uit eie reg moet wees, nie in ’n boksie gedruk word nie.

“Jy sou dink daai tyd is verby, vroue kan vandag doen wat hulle wil, maar nee. Ek word baie veroordeel omdat ek so hard werk. Die persepsie is dat jy, hoewel nie noodwendig ’n tuisbly-ma nie, nie te veel ambisie moet hê en jou eie drome najaag nie. Want dan is jy nie ’n goeie ma nie. Gelukkig ondersteun Jody my al die pad.”

Lees die volledige onderhoud én sien nóg foto’s in die Februarie-uitgawe.

FEBruair sarie diaan lawrenson 2017

Lees nou

SA Michelin-sjef Jan Hendrik behou sy ster

Andriëtte Norman verwelkom eersteling

Dié Hollywood-paartjies is al vir jare saam

  • Sonja Rocher

    O my jinne, Diaan is ‘n mooi mens ens sy word net mooier! Diaan ek bewonder jou vir jou harde werk en ondersteun jou 100%. Vrouens MOET ‘n eie identiteit en loopbaan he. Ek staan amper aan die einde van my loopbaan en het ‘n leeftyd opgegee vir my gesin. Gelukkig het ek die geleentheid op hierdie laat ouderdom gekry om in China te werk en ek is in my element. Natuurlik is ek nie spyt dat ek kinders gehad het nie, hulle is absoluut alles in my lewe. Ek is spyt dat ek baie jare op ‘n man gemors het vir wie ek met alles in my ondersteun het en hy het dit nie verdien nie. Dit is ongelukkig bitter soet.