7de Laan se Diederik praat reguit

Deur Marguerite van Wyk, SARIE - April 2010

7de Laan se Diederik praat reguit Galery

Hennie Jacobs, oftewel 7de Laan se Diederik, het met Marguerite van Wyk gesels oor hoe dié sepie Afrikaans en rasseverhoudings in Suid-Afrika bevorder.

Wat dink jy het 7de Laan gedoen om Afrikaans te bevorder?
Dit het 'n nuwe generasie van Afrikaans begin waar nuwe hoop onder mense begin posvat het. Dit maak van Afrikaans 'n lekker taal, en enige bevordering van een van die jongste tale in die wêreld is van groot belang.

Het dit bygedra tot beter rasseverhoudings in ons land?
'n Mens moet eerder kyk na kultuurverskille. Dit slaag daarin om mense bewus te maak dat daar eintlik net een ras is. The human race.

Wat is die lekkerste aspek van jou rol as Diederik?
Dis 'n fees om hom te speel. Hy is so 'n eerlike karakter. Hy's ook al op baie vlakke getoets en elke keer was dit 'n ongelooflike uitdaging.

Hoekom dink jy is dié sepie so gewild?
Dit werk want dit is 'rêrige' mense wat 'rêrige' karakters speel. Mense kan hulle met die karakters vereenselwig – ook met hul gebeure en emosies. Dit dek 'n wye spektrum van kulture.

Julle het blykbaar geweldig baie respek vir Danie Odendaal as vervaardiger?
Ja, hy verdien ons respek omdat hy so hands-on is. Hy is so trots op sy produksie. Hy weet hoe om vir mense stories te vertel wat nuwe hoop bring, wat hulle werklike emosies laat ervaar, maar waar hulle ook 'n halfuur lank kan afsluit en in 'n ander wêreld ontspan.

Wat is die wysste woorde wat iemand nog ooit vir jou op die 7de Laan stel gegee het?
Chris Vorster het vir my in die eerste twee weke wat ek daar was, gesê: "Dis baie nice wat jy doen. Die challenge is nou om dit elke dag, vir hoe lank jy ook al hier gaan wees, so te hou . . ." 'n Mens is net so goed soos die laaste toneel wat jy gedoen het. Om 'n standaard van hoë gehalte vir jouself te stel en dit daar te hou – dis wanneer jy suksesvol raak.

* In die Mei-uitgawe van SARIE, nou te koop, is daar nog 21 Laners wat vertel wat 7de Laan vir hulle beteken. Daar is ook hope ongelooflike glansfoto's!

Verwante artikels

Kommentaar

Web Development by FormFunction