Charlize oor Dior J'adore

SARIE Januarie 2010

Charlize oor Dior J'adore Galery

Charlize is al ses jaar lank die gesig van Christian Dior se “goue” parfuum, J’adore. Sy vertel oor haar 'liefdesverhouding' met dié geur.

Dié parfuum, wêreldwyd Dior se gewildste, is nou tien jaar oud. John Galliano, kunsdirekteur van Dior en van die J’adore-veldtog, het Charlize om ’n goeie (gulde) rede gekies. Soos Galliano dit stel: “Goud is ’n mitiese kleur, dis sinoniem met Dior. Met haar natuurlike goue hare is Charlize die nuwe Marilyn (Monroe) van die 21ste eeu. Sy vergestalt die Hollywood-droom beter as enigiemand anders. Met haar inherente sensualiteit het sy dadelik die godin van goud op die stel van die advertensie geword. Sy het J’adore verpersoonlik en almal in die ateljee betower.”

Hoe het jy gevoel toe jy die eerste keer J’adore geruik het? Watter woorde het by jou opgekom?
Dit was vir my sexy en sterk, dis hoekom ek so daarvan hou. Dis nes ’n vrou . . . sensueel en waaghalsig.

Toe J’adore bekend gestel is, het Christian Dior Parfums dit so beskryf: “Vreugdevol, goddelik, optimisties, stralend”, geskep vir ’n “vry en hedonistiese vrou”, “’n absoluut vroulike geur”. Herken jy jouself in hierdie woorde? 
Dis moeilik om na myself te kyk en sulke dinge op my van toepassing te maak, maar ek is ’n vrou en ek dink alle vroue is goddelik. En ek is beslis optimisties.

Jasmyn, ilang-ilang, roos en soetemaling is onder die top- en hartnote van J’adore. By watter noot vind jy die meeste aanklank?
Ek kan nie een bestanddeel uitsonder nie, want dis die kombinasie van almal wat die parfuum so besonders maak. Dit gee my beslis ekstra selfvertroue en laat my sexy voel. Dit vang die essensie van glamour vas en is terselfdertyd hartstogtelik.

Jy het netnou vertel van jou samewerking met John Galliano, die maestro agter alles. Werk jy ook nou saam met die regisseurs en fotograwe van die J’adore-veldtog?
Dié soort samewerking is my gunsteling-deel van die artistieke proses. Trouens, dié aspek van toneelspel is so opwindend dat dit my na vervaardiging gelei het.

Waar dra jy graag jou parfuum?  
J’adore ís my gunsteling en ek dra dit aan my nek, agter my ore en op my polse – al die sexyste dele van ’n vrou!

Is J’adore ’n uitdrukking wat jy dikwels gebruik? (Dis Frans vir “ek is mal oor” oftewel “I adore”.)
Dis ’n wonderlike frase. Wat is daar om nié oor mal te wees aan J’adore nie?

Verwante artikels

Kommentaar

Web Development by FormFunction