Marita van der Vyver se hartsdinge
Foto’s: Carina Stander Galery
Dis nou al 10 jaar dat Marita van der Vyver nesskop in Provence. Hier wys sy vir die eerste keer gunsteling-plekke in haar buurdorp, Vaison la Romaine, waar sy dikwels kom – haar eie dorp bly haar “wegkruipplek”
MY STRAATJIES
Foto regs: Hier’s ek in Vaison la Romaine se Cité Médiévale.
“Die lappe laventelveld is so pers dat dit lyk asof derduisende botteltjies kristalviolet uit ’n vragvliegtuig geval het.” Laventel is inderdaad oral!
Ons woon ook in ’n Rue de l’Église (Kerkstraat). Die meeste mense op my dorp weet nie ek’s ’n skrywer nie!
Selfs die straatlampe is vol romantiek.
MY SPEELPLEK
Fontein in Vaison la Romaine
Ek was een van die ma’s wat moes bystaan toe Mia se skool ’n uitstappie na die Gallo-Romeinse ruïnes gehad het vir die vak Antieke Geskiedenis. Die kleintjies het lekker gegiggel oor die antieke toilette en baddens.
Cité Médiévale: Toe my seun Daniel jonger was, het ons mekaar in dié ommuurde Middeleeuse stad op die heuwel rondgejaag en Dracula gespeel. Só maak ’n mens die geskiedenis interessant vir ’n kind.
MY LIEFDES
Ek het ’n swak vir sjokolade! Ek maak ’n draai by die chocolatier wanneer ek blou of vrolik voel, troos soek of iets wil vier. 2
Elf jaar gelede het ons my eerste Franse verjaardag saam met my sus Hanna en vriend Koos by dié restaurant langs die rivier gevier. Hulle is net sulke smulpape soos ek.
Ek’s ’n obsessiewe leser. Dié winkel stal soms boeke op die sypaadjie uit. In my eerste jaar oorsee het ek ál my boeke hier gekoop. Nou bestel ek dit oor die internet. Afrikaanse slaaptydstories is steeds die geheime wapen waarmee ek my kroos lief maak vir die taal. Jare later onthou hulle steeds die slaaptydritueel.
Ek’s lief vir antieke mooigoed, al kan ek dit selde bekostig. Eintlik lewe ek nogal beskeie hier in Frankryk, aangesien ek ook maar in rande betaal word.
Dié versteekte kerkbinnehof is my stil wegkruipplek. Kyk, skryf is nie altyd lekker nie. Ek wroeg om dit te laat lyk asof die woorde maklik kom. To make it seem seamless, soos Herman Charles Bosman sou sê.
MY KOS
Saterdae besoek ons die vars produktemark. Hier’s sampioene in die herfs, truffels in die winter, aspersies en kersies in die lente, aarbeie en spanspek in die somer.
In Frankryk spog die onbenulligste gehuggie met ’n bakkery. Soggens eet ons croissants en loop met ’n Franse fluitbrood (baguette) onder die arm.
Ons gunsteling-kaas is Mont d’Or. Dit beteken “heuwel van goud.” Dis ryk en romerig met ’n donsige bo-laag en ’n effense pienk skynsel. Ons eet dit almal saam met teelepels uit die ronde houtboksie waarin dit kom.
Dié swart Nyons-olywe kom uit ons streek en is my gunsteling.
Lees ook Marita van der Vyver se SARIE-rubrieke hier
Verwante artikels
-
Blog: Marita en kie op toer in Frankryk - FOTO'S
SARIE - September 2009 | Kommentaar: 21
In ons Julie-uitgawe het ons julle vertel van 'n inspirerende toer Frankryk toe saam met skrywer Marita van der Vyver. Dié van wat moes tuisbly, kan dag vir dag saamtoer danksy dié blog. Geniet!
-
Blog: SARIE-lesers en Marita in Frankryk - Toer 2
SARIE - September 2009 | Kommentaar: 8
Die 2 SARIE-toere is nou agter die rug en was 'n reuse sukses. Dít het toerleier, Lanie van Reenen te sê gehad.
-
Marita van der Vyver: "Soveel streke, soveel soene"
SARIE - Desember 2010 | Kommentaar: 1
In Frankryk word die mond slegs vir romantiese en erotiese soene benut.
Kommentaar