graad
Bekendes

Ons Vrydaglysie: Sterre met grade!

Net toe jy dink hulle is mooi, trek stylvol aan en is vol talent, moet jy hoor dis nie al nie: hulle is boonop geleerd. Dié bekendes het grade en baie van hulle het daarna nog verder studeer, of hulle studeer steeds …

Die idee met ons gereelde Vrydaglysie is dat jy dit rustig deurlees vir inspirasie, sonder fokus en vreeslike konsentrasie. Geniet dit, probeer kalm bly en kies sommer jou rolmodelle uit die lys.

1. Rowan Atkinson
Hy is dalk meer bekend as Mr. Bean, maar Rowan Atkinson het sy MSc-graad in elektriese ingenieurswese aan die Queen’s College by Oxford behaal.

 

2. Sacha Baron Cohen

Sacha is bekend vir sy rolle as Borat en Ali G. Hy het by die Universiteit van Cambridge sy graad in geskiedenis gekry.

 

3. Chris Martin

Gwyneth Paltrow se eksman en voorsanger van die groep Coldplay het aan die University College London (UCL) die Antieke Wêreld bestudeer en het baie goed gevaar in Grieks en Latyn. Dit is ook hier waar hy die toekomstige lede van Coldplay, Jonny Buckland, Will Champion en Guy Berryman, ontmoet het.

 

4. Gerard Butler

Die akteur was op sy dag die voorsitter van die regsvereniging aan die Glasgow-universiteit! Gerard het sy regsgraad aan dié universiteit behaal en daarna sy klerkskap in Edinburg gaan doen. Maar Independant berig dat ’n week voor hy sy internskap sou klaarmaak om as prokureur te kwalifiseer, afgedank is. Wel, dit lyk vir ons of sy Plan B, ’n loopbaan as akteur, toe tog uitgewerk het …

 

5. Ricky Gervais

Hy het ’n graad in filosofie by die University College London (UCL) gekry. Dit is ook waar hy Jane Fallon ontmoet het. Die paartjie is al sedert 1982 saam.

 

6. Wladimir Klitschko

Dié bokser het sy doktorsgraad in sportwetenskap.

 

7. Lupita Nyong’o

Sy het haar meestersgraad in toneelspel aan die Yale-universiteit behaal.

 

8. James Franco
As dit by James Franco kom, voel ek ietwat onbevoeg om sy lys grade weer te gee. Talle publikasies het al met hom onderhoude gevoer en sy CV uiteengesit. Lees wat Pase Magazine al neergepen het of, die lang profiel wat New York Magazine oor Franco geskryf het.

Kortliks: hy het onder meer grade van die Universiteit van New York (in rolprentvervaardiging), die Columbia-universiteit (meestersgraad in die kunste, spesifiek vir skryfkuns), Brooklyn-kollege (fiksie) en Warren Wilson-kollege (poësie).

 

9. Brian May van Queen

Hy het wiskunde en fisika studeer en het ’n BSc-honneursgraad in fisika.

 

10. Natalie Portman

In 2003 het sy haar sielkundegraad aan die Harvard-universiteit behaal. Sy het aan New York Post gesê: “Ek gee nie om as dit [universiteit] my loopbaan verwoes nie. Ek wil liewer slim wees as wat ek ’n filmster wil wees.”

Natalie Portman se man ster van dokumentêr!

 

11. Lisa Kudrow

Een van ons gunsteling-vriende is toe eintlik baie slim, hoewel haar rol in Friends dit nie laat blyk het nie. Lisa het biologie gaan studeer met die oog daarop om haar pa, dr. Lee N. Kudrow, by te staan met sy navorsing oor hoofpyn.

 

12. Rooney Mara

Rooney Mara, wat vanjaar vir ’n Oscar genomineer is as beste vroulike byspeler vir haar rol in Carol het ’n graad in sielkunde en internasionale beleid. Dit is soortgelyk aan die waarde-en-beleidstudies wat SA universiteite aanbied.

 

13. Tina Fey

Sy is een van ons gunsteling-aktrises en -skrywers, en dalk is dit omdat sy spesifiek geleer het hoe om ons te vermaak. Sy het haar dramagraad aan die Universiteit van Virginië behaal.

 

14. Rebel Wilson

Sy is een van ons gunsteling-komediante en is nog te sien in die film How To Be Single. Rebel het ’n BA-graad in drama en regte.

Embed from Getty Images

Rebel Wilson was glad nie beïndruk met die Kardashians nie

 

15. Miuccia Prada

Dié Italiaanse sakevrou en ontwerper agter die handelsmerke Prada en Miu Miu het haar doktorsgraad in politieke wetenskap behaal.

 

16. Martha Stewart

Sy het ’n graad in Europese en argitektoniese geskiedenis.

 

17. The Rock, oftewel Dwayne Johnson

Hy het ’n algemene BA-graad met kriminologie en fisiologie as hoofvakke.

 

18. Eva Longoria

Sy het in 2013 haar meestersgraad in Chicano-studies aan die Universiteit van Kalifornië gekry. Dit is die studie van Latyns-Amerikaanse en Mexikaanse Amerikaners.  SheKnows berig haar tesis-onderwerp was “Success STEMS From Diversity: The Value of Latinas in STEM Careers”. Sy het ook ’n graad in kinesiologie.

 

19. Art Garfunkel

Dié helfte van die musiekgroep Simon & Garfunkel het sy meestersgraad in wiskunde aan die Columbia-universiteit behaal. Hy het ook verskeie ander kursusse in wiskunde gedoen en klas gegee, berig The Science & Entertainment Exchange.

 

20. Emma Watson

Emma Watson het in 2014 haar graad in Engelse letterkunde aan die Brown-universiteit behaal. Nie net kan sy nou saamgesels oor die Engelse taal nie, sy het ook baie te sê oor geslagsongelykheid. Kyk die video vir haar #HeForShe-beweging hier.

21. Jannie du Plessis

Die Springbok is eintlik dr. Jannie du Plessis. Hy het in Bloemfontein aan Kovsies medies studeer.

 

Lees ook

Ons Vrydaglysie: Kan jy nog dié temaliedjies saamsing?

Die geheime van slim koop by jou supermark

Hou jou slimfoon jou jonk en maer?