Bruid

TROUFOTO’S: Erica Wessels se hele album

Ware liefde het nie maklik gekom vir aktrise Erica Wessels nie. Maar in Desember verlede jaar het sy en haar geesgenoot, Willem Boshoff, in boheemse styl bruilof gehou. Sy deel haar troualbum met SARIE en ons lesers. 

Sy het lank geworstel om ware liefde te vind. Erica Wessels glo egter sy het met elke liefdesverhouding – en daar was ’n hele paar – ’n bietjie wyser geword.

“Ek het die skoonheid en donker in myself ontdek met elke verhouding, maar nou voel ek gereed om aan te beweeg,” vertel sy.

Ek weet ek het die regte een ontmoet. Ons is gereed vir die toekoms.

“’n Gemeenskaplike vriendin het ons sowat twee jaar gelede aan mekaar voorgestel en ons het net dadelik begin gesels. Willem voel soos ‘huis’. Ek voel veilig by hom,” blom sy terwyl sy ’n rukkie voor die troue met SARIE-joernalis Marguerite van Wyk praat.

FOTO Lavonne Bosman

Erica en Willem het elkeen hul eie beloftes aan mekaar afgelê
FOTO Lavonne Bosman

Willem, ’n aktuaris, lag skamerig. “Ek is mál oor haar. Sy is mooi, ons het dieselfde lewensuitkyk – ons filosofeer oor intellektuele flieks, politiek en dieper dinge.”

“Toe ek jonger was, het ek soms ’n oor-idealistiese idee van die liefde gehad,” sê sy. Erica is nou 38, Willem 40. “Ons het ’n volwasse, real liefde,” meen sy. “Ons waardeer die klein dingetjies, soos om springmielies te eet en ’n DVD te kyk op ’n Sondagaand.”

Natuurlik is daar tye in hul verhouding wanneer die vuurwerk blits, of die vlinders in hul maag woel, maar Willem glo die liefde lê dikwels in die alledaagse. Om mekaar te help skottelgoed was. Of saam kos te maak.

Hulle deel baie belangstellings, en is veral dol daarop om in die berg te gaan stap. “Groenigheid, die natuur, is ’n soort spirituele ervaring.”

Willem het Erica trouens gevra om verloof te raak toe hulle op 11 September verlede jaar gaan blomme kyk het in die Weskus Nasionale Park. Trots wys sy haar vintage opaalring (foto hieronder) en vertel Willem se ma, Elena, wat in 2011 oorlede is, se diamantring is oorgemaak vir die troudag.

FOTO Lavonne Bosman

FOTO Lavonne Bosman

Willem oor sy bruid op die troudag: 

“Ek het in trane uitgebars toe ek haar sien. Ek weet almal dink hul bruid is die mooiste, maar Erica was net asemrowend.”

Groot vreugde en kruie-konfetti FOTO Lavonne Bosman

Groot vreugde en kruie-konfetti
FOTO Lavonne Bosman

Erica was baie dankbaar dat haar pa, Erich (foto hieronder), wat gevorderde demensie het, met haar daardie laaste ent kon stap. “Dat hy my kon weggee aan Willem, het die wêreld beteken. Die trane het geloop.”

Kosbare familie-tyd vir Erica en Willem met haar ouers, Erich en Heléne FOTO Lavonne Bosman

Kosbare familie-tyd vir Erica en Willem met haar ouers, Erich en Heléne
FOTO Lavonne Bosman

Dié storie het oorspronklik in ons Februarie 2017-uitgawe verskyn. Dié uitgawe is nie meer beskikbaar nie, maar kan steeds digitaal afgelaai word.

Kyk na die res van die foto’s hier:
Alle foto’s: Lavonne Bosman

Aardse elemente vir ’n bostroue – ’n bloekomtakkie versier ’n linneservet.

Op die bruidstafel was vintage elemente soos koperblakers en ou glasbottels. Erica en twee vriendinne het sewe uur lank al die blomme (en ook ruikers) gedoen.

Antieke snuisterye soos dié sakkie is ingespan vir die dekor. Erica het kwistig by familie en vriende geleen.

Bloekomtakkies en ander stukkies fynbos word in haar hare gesteek vir ’n bosvoorkoms.

Elke troue het ’n krisis. Voor die seremonie het die rok se ritssluiter gebreek, maar dis deur ’n helpende hand vasgewerk. Die bruid was 50 minute laat!

Onder hoë dennebome sit 150 gaste in afwagting vir die groot oomblik.

Getroud en ’n oomblik van saligheid.

Drie blommemeisies het pret met die kruie-konfetti. In die middel is Leonore Wessels, Erica se broer, Jurie, se dogter. Links en regs is haar suster Liezl van Tonder se dogtertjies, Mia en Mignonne.

Die egpaar en Erica se suster, Lali Pellissier (blou rok), haar vriend, Theo Roodman, en haar seuns (van links), Jean Pierre, Erich, Samuel en heel regs Emile.

Haar roomwit rok van meters Victoriaanse kant, satyn, pêrels, kralewerk en mooi inlegstukkies antieke materiaal waarin haar oudste suster, Lali Pelissier, dertig jaar gelede getrou het, het soos ’n handskoen gepas. “My sus het dit sowaar met die hand gewas om nuwe lewe daarin te blaas.”

Erica se sielsgenote (van links agter): Michael Matthews, Marelize Raubenheimer, Carla Steenkamp, Renier Ridgeway en Chris Kriek. Van links voor: Chloe Williams, Trude Gunther, Juanita Kotzé en Erica.

Erica en Willem bedank:

• Wyn: Montpellier Tulbagh 023 230 0656
• Venue: Winery Road Forest info@wineryroadforest.co.za
• Fotograaf: Lavonne Bosman www.lavonne.co.za
• Tweede fotograaf: Tabitha Mee illuminatephotography.co.za
• Musiek: Lonesome Dave Ferguson 074 132 0456 en Your DJ info@yourdj.co.za
• Ringe: Adi Cloete adicloete@gmail.com
• Kos: Avec Mari mariloumarais@gmail.com
• Blomme: Jackie van Crown Flower Marketing 021 448 6886
• Dekor: Pretty Vintage, Blooming Wonderful, Indigenous www.indigenous-store.co.za
• Linnejapon terwyl sy gereed maak: WASS www.wassskin.com
• Tekstiel-drukwerk met aanhalings in die bos: Imaterial www.imaterial.co.za
• Grafiese ontwerper: Hester Bergh www.trill.co.za
• Grimering en hare: Saskia Buxton van MLC 060 818 9328

  • Cathy Louw

    Aaaah dit was regtig so mooi en sprokiesagtig…ai die liefde is en bly mooi. Mag julle liefde altyd blom.