img_0846
Eie stories

60 sekondes met Marlene van Jaarsveld (kunstenaar)

Hoe lank woon jy al in Bangkok? En waarom dié stad?
Ons woon reeds ‘n bietjie meer as twee jaar hier. My man, Ockert, se werk het ons hierheen gebring uit Malmo, Swede. Voor Swede het ons ook in Oekraïne en Rusland gewoon en gewerk. Ockert bedien Suid- en Suidoos-Asië as finansiële direkteur vir ‘n Sweedse maatskappy vanuit die hoofkantoor hier in Bangkok.

Wanneer is jy uit SA weg, kom jy terug?
Ons is presies tien jaar gelede uit Suid-Afrika weg en beplan om ná aftrede terug te gaan. Twee van ons seuns werk in Suid-Afrika en een studeer in Australië.

Skilder jy al jou lewe lank?
Ek het maar altyd met verf rondgespeel en enigiets kreatiefs het my altyd geïnteresseer – van kleins af. Ek het altyd goeters gemaak, geverf, geteken en geskryf. Alhoewel ek in tale en algemene taalwetenskap studeer het, het ek altyd na die esel en verfkwas gehunker. Ek skilder reeds meer as 20 jaar lank, maar het dit eers in Rusland as beroep begin beoefen toe ek aangestel is as kunsonderwyseres by die Anglo-Amerikaanse Skool van Moskou.

Jy reis baie… is dit vir inspirasie of verkies jy die rondreisende leefstyl?
Alhoewel ons ons kinders baie mis (gelukkig was hulle by ons vir ‘n groot gedeelte van die ondervinding) geniet ons die leefstyl van rondreis, wat grootliks gepaard gaan met werk vir Ockert. Die inspirasie-gedeelte kom as bonus. Dit voel ongelooflik bevrydend om te reis. Reis laat my die passie wat ek reeds jare saamdra, ontwikkel omdat dit my bevry van spesifieke kulturele “moenies” en inhibisies. Ek is in my element as ek ‘n foto kan neem van ‘n tandlose ou omie net onder die Groot Muur in Beijing, of van helder geweefde plastiekmandjies in China Town in Bangkok.

Waar in die wêreld het jy al oral uitgestal? Enige interessante staaltjies?
My vorige uitstallings was almal groep-uitstallings in Suid-Afrika, Rusland en China. Hierdie twee is die eerste solo-uitstallings. In Beijing, China, moes ek my werk saam met internasionale studente uitstal by drie internasionale skole. Ek is reeds die eerste dag uit die taxi gegooi omdat die taxi-bestuurder my nie kon verstaan nie! Tydens ‘n uitstalling in Moskou het ons ‘n reusebedrag ingesamel wat ek aan ‘n skooltjie in die Andaman-see (Phang Nga-baai) gestuur het vir herstelwerk ná die tsoenami.

Die skooltjie is na aan my hart omdat ons dit ‘n paar keer voor die tsoenami reeds besoek het. Ongeveer twee maande gelede kon ek dit weer besoek en met groot opwinding en trots die herstelwerk en vordering, veral in die Engelse taal-klassie, self meemaak. Die beste storie is egter van die skilderye wat ek op die sypaadjie verkoop het hier in Bangkok. Terwyl ek my skilderye by ‘n galery gaan “wys” het en besig was om dit in te dra, slaan ‘n motor remme aan, stop en ‘n man spring uit en skree, “Who is the artist, I want THAT one!” Asof ‘n nuwe moet-hê-manie pas bekendgestel is, slaan nog ‘n motor remme aan. Die keer ‘n hotel-limosine met ‘n Arabier wat in geradbraakte Engels sê, “I want art… I buy that one!” Toevallig was dit twee van my duurste skilderye en ek het vir ‘n maand daarna nog op die sypaadjie-bemarkingswolk geloop!

Jy noem dat Skandinawiese eenvoud balans bring in die andersins baie ryk en kleurryke uiting van jou werk – wat beteken dit vir jou?
Die eenvoud en minimalistiese benadering in Skandinawiese ontwerp en gebruik van kleur, het my geleer dat ek nie alles op een verfdoek hoef in te prop nie en ook nie al die detail hoef weer te gee nie. Een ding op ‘n slag en min maar treffende kleure maak ‘n rustige stelling. Dit is ook soos die Skandinawiërs die lewe in die algemeen benader.

Waar in SA kan ons van jou werk te sien kry?
My werk word in Suid-Afrika bemark en op die internet verkoop deur South African Artists’ Web. As gevolg van die afstand is dit my beste opsie. Van my skilderye is in privaat-versamelings in Suid-Afrika, Thailand, China, Rusland, Nieu-Seeland, Amerika en Engeland.

  • Marlene van Jaarsveld

    Wow ek is verstom om die artikel na 2 jaar te ontdek. Dankie Sarie!!