Eie stories

Cindy Rudman van Caledon, skryf:

My eie

Hoe dankbaar is ek nie vandag dat dinge soms anders uitwerk as wat ek wou gehad het nie, want as dit sou, het ek jóú gemis. Ek kan nie my lewe nou sonder jou voorstel nie. Jy was nie waaroor ek my lewe lank gedroom het nie … jy was méér. Jy was die onmoontlike waarvoor ek my knieë jare lank gebuig het voor die Here.

Jy het in my lewe gekom soos ’n eerste bloeisel ná die winter. Jy het vir my hart baklei en toe jy dit het, het jy dit met alles in jou beskerm. Toe mense rondom ons se lewens/verhoudings en huwelike uitmekaar val en ek met bang oë na jou gekyk het, het die liefde vir my in jou oë die storm in my rustig gemaak.

Weet jy hoe waardeer ek jou? Weet jy hoe waardeer ek al jou pogings om my te laat lag as ek die dag af voel? Of as ek dikbek sit en jy ferm, maar vol liefde vir my sê ons moet dit nou uitsorteer? Dat jy steeds kan jammer sê en dit bedoel. Ek waardeer die liedjies wat jy vir my skryf en sing. Weet jy hoe waardeer ek die manier hoe jy my lief het? En as ons stry, is dit net oor klein goedjies en nie goed soos ontrouheid of oneerlikheid nie.

Jy is nie perfek nie en juis dít maak jou vir my perfek. Dankie dat ek kan mens wees by jou. Jy’s nie net my sielsgenoot nie, jy is my beste vriend, by jou kan ek huil en by jou kan ek lekker lag! Dankie dat jy in my pms-ek-voel-vet-en-mislik dae net stil vir my glimlag, my vashou en my ruimte gee om af te blaas sonder om my uit jou oog te verloor. Dankie dat jy steeds tyd maak vir my en dat ek vir jou belangrik is. Dankie dat jy my ruimte gee om verkeerd te kan wees en my in ’n oogwink vergewe én dat ons nooit ou koeie uit die sloot grawe nie. Dankie dat ek nog my naam in jou gebede hoor.

Ek wil nie meer ’n groot huis met ’n luukse-motor hê nie. Ek wil vir jóú hê, want saam met jou kom al die goed wat geld nie kan koop nie. Saam met jou sal ons nie net altyd kos op die tafel hê nie, maar ook vertroue, opregte liefde, spesiale oomblikke, lawwe tye en gelukkige, dankbare harte.

Daar is ’n liedjie wat alles so mooi beskryf: “I wonder what God was thinking, when He created you. I wonder if He knew everything I would need because He made all my dreams come true. When God made you, He must have been thinking about me.”

Moeilike tye, trane en afstand het ons nie van mekaar geskei nie, maar net nader aan mekaar gebring. Al wil ek daardie tye nie gou weer oorhê nie, weet ek vandag verseker dat as dit rondom ons sou donker raak, ek verseker kan wees van jou sterk hand wat myne sal vashou.

Jy laat my vrou voel, jy laat my veilig voel. Ek sien uit daarna om saam met jou oud te word. Dis ’n voorreg.

Jyis “priceless” en ek is baie lief vir jou.