sr0812myselfbinne2
Eie stories

Meer navorsing nodig oor ander siektes

Daar is geldinsamelingsgeleenthede gehou, vrouens op motorfietse het die hele Suid-Afrika platgery, bra’s is verkoop of opgeveil, daar is op elke denkbare manier bewusmakingsveldtogte gehou, daar’s ’n strikkie van elke kleur vir verskeie kankers en ek haal my hoed af vir elkeen betrokke, elke vrou wat daardeur moes worstel, en halleluja! – elkeen wat ook oorwin het.

Maar wanneer gaan daar ’n strikkie of ’n bewusmakingsveldtog of ’n geldinsamelingsprojek wees vir navorsing oor ander degeneratiewe siektes of outo-immuunsiektes soos lupus, motorneuron-siekte, veelvuldige sklerose, rumatoïede artritis, ens.

Ek kan met gesag praat oor een van die verskriklike “disabling” siektes. Ek is in 1995 net ná my 30ste verjaarsdag gediagnoseer met rumatoïede artritis, ’n outo-immuunsiekte waar jou immuniteit teen jou eie liggaam draai, en in my geval die gewrigte en weefsel van die liggaam aanval. Drie jaar ná my diagnose het ek my eerste heupvervanging gehad, ses maande later my eerste handoperasie (eerste van vele), ses maande later my eerste knievervanging waarna skroewe in my nek gesit is, nog ’n heupvervanging, nog ’n knievervanging, elmboogvervanging, twee voetoperasies, en skoueroperasies met medikasie wat my daagliks net sieker laat voel. 

Ek is in November 1996 medies ongeskik verklaar, my huwelik het vier jaar later in die egskeidingshof geëindig. Ek het nooit die voorreg geken van ’n kind in die wêreld bring of vashou nie.

In April 2007 het ek probleme met my blaas en niere ondervind. Vandag het my (R) nier slegs 24% funksie en my (L) nier 76% funksie. Die uroloog sit ’n stent in my linkernierpyp nadat ’n obstruksie ontdek is. As gevolg van die stent beland ek elke ses weke in die hospitaal met ernstige bakteriële infeksie. In Maart 2008 kry ek ’n pulmonêre embolis, wat beteken daar is ’n bloedklont deur my hart en longe. As gevolg daarvan is my hart vergroot en ek word op hartmedikasie en daaglikse bloedverdunningsmedikasie gesit. My maag begin bloei weens al die medikasie, en nou moet dit eers behandel word. 

Jy raak desperaat, hardloop van een dokter na ’n volgende spesialis, probeer homeopate, gryp na elke strooihalm wat voor jou gehou word. Gaan vir bevryding, na geestelike leiers, jou gedagtes is ’n maalkolk – “God, is dit deur sonde wat U hierdie swaar, swaar kruis op my neergesit het. Is dit voorvader-sonde? Wat kan ek doen om dit te verander?” Maar dan kry mens krag van Bo, jy kry berusting in die wete daar is ’n doel met alles, al verstaan ons menslike verstand dit nie. Die Heilige Gees vertroos my en sê “hierdie liggaam is net tydelik”.

Ek het nog baie om voor dankbaar te wees, my familie is my ondersteuningstelsel, ek het ’n baie goeie siekefonds, wonderlike spesialiste met wie ek ’n verhouding deur die jare opgebou het, die vermoë om nog kreatief te wees, en ’n maandelikse ongeskiktheidspensioen.

Ek vra nie simpatie deur hierdie skrywe nie, ek vra net dat daar ook bewusmakingsveldtogte en geldinsamelingsprojekte gehou word vir navorsing na die oorsake van hierdie siektes. 

Tertia Burger, Montana, Pretoria

  • Evert DuToit

    Jy is doodreg Mev Burger, dit is nodig dat daar baie meer bewusmaking nodig is vir al hierdie verskriklike outo-immuun siektes wat baie keer onder die radar bestaar. Baie dankie vir die brief!

  • Dr P.L. Erasmus

    Wel gedaan Tertia. Dis inderdaad ‘n vreesaanjaende siekte. En nie net dit nie dis ‘n vernietigende siekte. Dit wat jy moes deurmaak sal menige mens knak, maar jy het ‘n beter mens uitgedraai. As medikus kan ek net met jou saamstem. Ja al die ander siektes wat jy noem het bewusmakings veldtogte en met reg en verdienste. Maar soos jy sê ons het meer nodig. Ek weet medici pleit al lank hiervoor maar om een of ander rede wil die media nie aanvaar dat hier ook emosionele waarde is nie. VIGS byvoorbeeld laai emosies en veroorsaak ‘n respons van (en ek moet verskoning hiervoor maak maar ek ervaar dit daagliks), weersin, verbasing, afgryse, simpatie, ens. Oor RA en ander outo-immuun siektes word nie gepraat nie, want dit het nie dieselfde sensasie waarde nie. Asseblief ek vra saam met Tertia dat die sake ook aangeroer word en dat mense bewus gemaak moet word van die (ernstige) siektes.

  • Renier van der Merwe

    Kan nie genoeg saam stem hiermee nie. Die leiding van mense met hierdie tipe diagnose loop die pad maar alleen en verdien dieselfde ondersteuning as die wat Vigs en kanker het, deur die media en regering kry.

  • Lena Naude

    Ek stem saam dat navorsing oor enige siekte baie belangrik is, en voel saam met diegene wat aan ‘n meer seldsame siekte ly – want dit wil tog lyk of hulle afgeskeep word, beide met fondse en ook navorsing en aandag/artikels. En dan verstaan ons leke ook maar min van al die dinge waardeur die persoon wat aan ‘n siekte ly, moet gaan. My hart gaan uit na Tertia en alles wat sy al deurgemaak het. Mens kan byna nie glo dat die siekte al soveel verandering in haar lewe en liggaam gebring het nie, en tog is sy nog vol hoop en hou sy aan met blymoedigheid. Ek vertrou saam met haar dat daar iewers iemand is wat daadwerklik begin navorsing doen, met toewyding en dat die fondse beskikbaar gestel word en dat daar spoedige resultate sal wees om deurbrake met rumatoiede rumatiek te kry. Dit sal wonderlik wees om meer oor die siekte te lees te kry – en natuurlik ook van die ander "minder bekende" siektes. Dit sal ook help om die mense wat daaraan ly, beter te verstaan en miskien ‘n klein bietjie van hul las te help dra.

    Dankie vir elkeen se poging in die verband

  • Ina vd Westhuizen

    Tertia ek stem met jou saam. Ek is ook ‘n paar jaar gelede met RA gediagnoseer- het al twee operasies gehad wat verligting gebring het, maar nie die probleem weggevat het nie. Jy raak siek vir jouself, as jy elke aand ‘n handvol pille moet sluk, wat jy weet jou hele sisteem opfoeter. Pynpille probeer jy vermy, jy leef maar met die pyn saam. As gevolg van die pille wat jou sisteem vertraag, kry jy allerhande ander siektes. Ek het nou gordelroos ook gekry en kan nie besluit watter pyn is die ergste nie. Sterkte.Ek hoop regtig jy kry iets reg met jou brief.

  • Azelle Putter

    Dit neem sterk kinders van die Here om na so ‘n lang stryd steeds die goeie stryd te stry. Ek glo dit is net die krag van die Here wat mense in so ‘n lang stryd laat staande bly en nie in sak en as laat sit nie.

    Ek stem saam dat die medisie en reklame net moet fokus op die ‘bekende’ siektes nie, maar ook aan onbekende siektes waarvan ons nie altyd hoor / verstaan nie.

  • Ilse Lourens

    Ek stem 100% saam met Tertia. Daar behoort verseker meer aandag gegee te word aan bewusmaking en navorsing oor hierdie tipe degeneratiewe siektes wat net soveel mense se lewens beinvloed.

  • Adele McSherry

    Tertia… jy slaan die spyker op sy kop!! Ek sien weekliks kanker pasiente en het met verskeie HIV + pasiente te doen!! Dis nie lekker om te sien hoe ander mense ly nie! Maar HIV is nie meer so kruppelend soos dit vroeer jare was nie, met die regte medikasie kan mens ‘n normale lewe ly!!! En daar word heeltemal teveel gehammer op HIV!!

    Ek sien wat RA aan pasiente doen….. Daar is nie woorde om dit te beskryf nie. Nie tensy jy self daar deurgaan of iemand baie naby aan jou daardeur gaan nie!! Jy is in my gebede!!

  • P J du Toit

    Dankie Tertia dat jy die moed gehad het om die saak met Sarie op te neem. Daar is wel werk wat deur die Artritis Stigting gedoen word maar die bewusmaking van die algemene publiek bly agterwee. Sarie wil julle nie die leiding neem om meer hieroor te publiseer nie. ‘n Reeks met inligting deur leke en spesialiste kan baie help om mense ingelig te kry. Ek het self waargeneem hoe onkundig selfs hospitaalpersoneel is met die fisiese hantering van RA pasiente.

    Pieter du Toit.

  • Michelle Harding

    n Mens wil amper uitroep: "Tertia waar jy kry die krag om nog so n kreatiewe, goed bewoorde, brief te skryf!". Met vingers wat al lankal kromgetrek is van die RA, en konstante pyn in elke gewrig, en soos jy beskryf, slefs ook in meeste organe, kies jy om steeds jou vestand (wat onaangeraak word deur die vernietigende siekte), skerp te hou en aktief deel te neem aan Sarie se rubrieke en briewe.
    Jy staan vir n saak – n saak baie na aan jou hart… en te na aan jou ligaam! Jy staan op vir die saak wat te min aandag kry en derhalwe verstaan "Jan-alleman" nie regtig hoe vernietigend, alles-oorheersend, n outo-immuun siekte soos RA is nie.
    Dis eers wanneer iemand baie naby aan jou, RA kry, dat jy weet hoe swaar dit vir die persoon is. Jy vertsaan beter want die persoon is naby jou, maar jy is nie daai dierbare nie, en daarom verstaan selfs jy nie hoe erg die pyn is nie en verstaan selfs jy nie hoe dit die lewe in sy totaliteit probeer vernietig en steel nie. Ek sien die swaar stryd van my geliefde, ek sien die vrae waarop ek min antwoorde het .. en in dit alles is daar net een ding wat ek weet- ek weet, God is God, Hy is Skepper-Heer.
    Tertia ek sien jou geloof, hoe dit vir jou alles beteken – hoe jy weet God is die Skepper, dat Hy jou fyn aanmekaar geweef het in jou moederskoot(Psalm 139). Dis al wat ons soms het, is ons onwrikbare geloof in God wat alles weet en wat ons liefhet – ons verstaan dit nie altyd nie – maar Hy is God, Hy is Almagtig, Alwetend, Alomteenwoordig! Hy weet van al jou pyn!
    Ek daag Sarie uit om die storie van Rumatoiede Artritus na te vors en met dokters en pasiente te praat. Mag dit lei tot n artikel of twee oor outo-immuun siektes om sodoende vir "Jan-alleman" n blikkie te gee daarop. Ek wil Sarie bedank dat julle Tertia se brief gelees het en genoeg omgegee het om dit op julle web te publiseer!

  • J.P Harding

    Welldone Tertia. Soos Lance Amstrong in sy boek gese het as mens die siekte wat jy het verstaan kan dit gewen word en as daar iets gedoen kan word om ander mense hier van te leer so veel better. As daar n poging aangewent word met meer navorsing wie weet. Daar word soveel geld en tyd aan HIV spandeer wat goed is, maar daar is baie siektes wat mense min van weet. Tertia jou Positivity is Inspirational.

  • Deirdre Stols

    In hierdie era waarin ons leef met soveel "ingeligte" mense bly dit verstommend hoe min die algemene lid van die publiek weet van RA en verwante siektes – sommige aanvaar blykbaar met groot vrede dit is bloot net iets soos ou mens rumatiek of jig. Soos meeste van die ander brief skrywers wil ek ook beklemtoon ons is moeg gebombardeer met feite rondom
    VIGS- hoeveel keer kan jy mense waarsku oor dieselfde ding – as ‘n mens nie verantwoordelikheid kan neem vir jou lewenswyse en regte keuses wil uitoefen nie gaan die situasie mos nie verbeter nie en ander kan dit nie namens jou doen nie. RA het geweldige emosionele en sosiale implikasies -meeste van hierdie pasiente kan nie aanhou werk nie want elke kort-kort kan jy letterlik nie beweeg nie, jy is stok styf en elke tree is ‘n pyniging – geen werkgewer kan jou op hierdie manier in diens hou nie, hulle spandeer lang tye in hospitale vir behandeling wat ook net van korte duur help. Hoe versorg jy ‘n baba, hoe hou jy ‘n huis, ensovoorts, ensovoorts.

    Ons kan net elke dag uitroep dankie Here, dit is my gespaar – sekerlik suiwer uit genade. Vir elke RA, lupis, spondolitis en ander van hierdie lyers, sterkte ouens, mag die medici ook op hierdie veld groot deurbrake maak – as dit dan nog nie gesond gemaak kan word, vertrou ons saam met julle dat navorsing of medisyne ten minste die siekte kan laat stagneer en verdere misvorming kan keer.

    Deirdre Stols

  • Mitzi du Toit

    Tertia is my dogter en ek weet van die verminkende en pynlike toestande wat Rumatoid Artritis veroorsaak. As jare lange intekenaar van Sarie sal dit waardeer word indien u n reeks artikels kan plaas oor artritis en die groot verskeidenheid gedaantes waarin dit voorkom. Groter bewusmaking ook oor navorsing sal veel bydra tot beter begrip hieroor.

  • Cornelius West

    Tertia, jy is n sterk vrou ons haal ons hoede af vir jou. Ons stem saam die gewone man op straat het geen idee wat die siekte aan n mens doen nie.Dit beinvloed nie net jou lewe nie,maar ook familie en almal naby aan jou(vervoer,eet, was,aantrek ens)Dit sal goed wees as daar baie meer gedoen word deur navorsers en die media,om die siektes onder die publiek se aandag te bring. Sterkte

  • Susan Ferreira

    Tertia, ek stem saam met jou. Ek is ook so jaar en ‘n half terug met RA gediagnoseer. Mens raak partykeer bang vir dit wat mens lees. Maar dis so waar dat die mense om jou meer inligting moet kry en bewus gemaak word van die siekte. Ek lees baie oor RA en kry baie raad, maar ek weet ook by die Here is niks onmoontlik nie. Slegs Hy kan wonderwerke doen en ek glo dit met my hele hart. Dis ook Hy wat mens die krag van Bo gee om aan te gaan. Sterkte en Jesus Liefde vir jou en alle ander RA lyers.

  • Nelia

    Ek wil asb meer uitvind i.v.m GORDELROOS. Ek verneem dis dieselfde virus wat waterpokkies veroorsaak. As iemand met gordelroos in aanraking kom met iemand wat nie waterpokkies gehad het nie, kan dit aansteeklik wees?

  • stefanie storbeck

    goeie dag

    ek is dringend opsoek na inligting oor gordelroos, party mense sê dit is hoogs aansteeklik en ander sê dit is glad nie aansteeklik nie
    Wie moet ons glo
    wat kan jy gebruik vir die brand en pyn
    ek het pille gebruik vir ‘n week, maar dit pyn en brand steeds baie

  • Isabel Meyer

    Ek stem saam Tertia, ek is ook ‘n leier van artrose, maar ook ander gedrogte wat my getref het. As gevolg van my tiroiëd wat verwyder was (vyftien gewasse) het van my selle gemuteer en sit ek met igitose (acquired igitose) ook skoliose, en verskeie operasies, maagsere, hiatus hernia, kolonprobleme, gesigspyn. Te veel om op te noem. Isabel Meyer

  • Retha Wasserfall

    Ja ek stem saam dat daar meer navorsing gedoen moet word oor skaars siektes. Ek is gediagnoseer met Myositis laasjaar November maand. Is daar enige dokter wat iets weet omtrent die siekte wat ‘n mens kan gaan sien. Niemand weet genoeg van die siekte af in Suid-Afrika nie. Ek praat met mense oorsee en hul almal se dat ek die verkeerde behandeling kry.