Mariza23 copy
Dieet

Dieetkundige Mariza blog: Twee, drie of ses keer op ’n dag?

Wenk 3 in ons kort reeks: Staal jouself teen dik beloftes van dunwees …

In die vorige blog het ek meer vertel oor hoe net die manier wat jy jou kos gaarmaak, jou goeie gewigsverlies- en gesondheidsvoornemens in die wiele kan ry. Iets so eenvoudigs soos om ’n bredie of roereier te maak kan ’n groot invloed hê op inflammasie in jou lyf. En omdat inflammasie ’n sneller is vir onder meer insulienweerstandigheid en die onvermoë om koolhidrate te hanteer, kan dit “sorgelose” gewigbeheer belemmer.

In hierdie blog wil ek jou graag nooi vir ontbyt, middagete, aandete en, as jy lus het, teetyd. En miskien, saam met laasgenoemde, ietsie te ete. Nee? Jy mag nie tussenin eet nie? Of sal nie, al wil jy? Dalk is jy gedetermineerd om ook jou “honger” te oorwin. (Meer oor dié belofte in die volgende blog in ons reeks).

As jy ’n ou hand is wanneer dit by “dieet” kom, het jy seker al gehoor: Eet 6 maaltye per dag – dis nodig vir gewigsverlies. Die ander kant van die munt is moontlik ook aan jou bekend: Jy behoort net 3 maaltye per dag te eet. Dan staan sommige streng ouens weer by 2 etes per dag, of glo hulle selfs dat jy net ’n paar dae van elke week regtig moet eet en elke nou en dan gereelde vasdae (intermittent fasting) moet hê.

Wat is reg en wat is weg?

Mense is metabolies verskillend. Sommige voel beter as hulle meer gereeld eet, terwyl ander heeltemal goed doen as hulle net ontbyt eet en dan weer laatmiddag of vroegaand voor ’n bord kos inskuif.

As jy sukkel met bloedsuikerbalans, kan dit vir jou van waarde wees om nie tussen maaltye te peusel nie of dan jou teetydkeuses so aan te pas dat jy nie jou bloedsuiker omkrap nie. Neute, sade, rou groente en selfs ’n klein porsie vrugte of stukkie kaas of kouevleis is goeie keuses vir teetyd. Maar as jy geneig is om te veel te eet of in ’n koshuis was en steeds leef met die gedagte van “wat as ek nie later genoeg kos gaan kry om te eet nie” in jou onderbewussyn, kan dit jou weer baie help om met jou eie kop te smokkel. Stel jouself gerus dat jy net nodig het om genoeg te eet by hiérdie maaltyd, want oor 2 uur gaan jy weer iets soos ’n vrug en ’n lekker hand vol neute kan eet. Dit help nogal vir daardie benoudheid wat so kan knaag en homself kan voordoen as “skyn-honger”.

Nóg belangriker is om maaltye te sien as geleenthede om genoeg kos – of meer spesifiek voedingstowwe – in jou lyf in te kry. So moet jy mik om 400 g groente daagliks te eet! Dit gaan maar knor om dit reg te kry as jy dit in één ete probeer inprop. Dis baie makliker as jy hier en daar aan ’n paar stukkies knaag, oor middagete weglê aan ’n lekker slaai of groentesop, en dan vanaand al die groente opskep waarby jy nog nie deur die dag uitgekom het nie.

Wat etenstye betref, is die kuns om na jou eie liggaam se behoeftes te luister en dan dienooreenkomstig te eet. Dis baie beter as om reëls te probeer toepas wat jou nie pas nie en wat nie noodwendig in jou beste belang is nie. Wanneer jy eet, maak wel saak: ’n middagete wat meer substansieel is en voor 14h00 genuttig word, help vir gewigsverlies. Maar wát jy eet, weeg veel swaarder. Dít moet beter wees. Beter koskeuses. BeterEet.

Lees ook