ys4f9984
Dit laat jou dink

Van die spoor af?

‘n Mens hoor gereeld jy moet op jou sterk eienskappe fokus om sukses te behaal. Maar soms kan juis dié eienskappe jou kniehalter.

Ontsporingseienskappe – en hoe dit jou kan help én pootjie:

MAKLIK OPGEWONDE

Jou sterk punt: Jy’s passievol en intens.

Oppas hiervoor: Jy is oorentoesiasties oor mense en projekte, word vinnig teleurgestel en voer nie jou projekte deur nie. Jy’s buierig en moeilik om tevrede te stel.

SKEPTIES

Jou sterk punt: Jy’s skerp en ’n goeie waarnemer.

Oppas hiervoor: Jy’s sinies, oorsensitief wanneer jy gekritiseer word en vertrou nie mense nie.

VERSIGTIG

Jou sterk punt: Jy’s konserwatief en vat nie onnodig kanse nie.

Oppas hiervoor: Jy’s bang om gekritiseer te word en waag daarom nie kanse nie. Jy wil niks verkeerds doen nie en bestee te veel tyd aan projekte om dit perfek te kry. Jy kan nie besluite neem nie.

Gereserveerd

 

Jou sterk punt: Jy is taai en onafhanklik.

Oppas hiervoor: Jy’s afsydig en ongeïnteresseerd in mense. Jy kommunikeer nie goed nie.

Kalm

Jou sterk punt: Jy’s opgewek en werk goed met ander saam.
Oppas hiervoor: Jy’s passiefaggressief, geïrriteerd, koppig en ignoreer ander mense se versoeke.

Waaghalsig

Jou sterk punt: Jy’t selfvertroue en weet wat jy wil hê.

Oppas hiervoor: Jy sukkel om jou foute te erken en uit jou ervaringe te leer. Jy’s arrogant en oorskat van jou vermoëns.

Ondeund

Jou sterk punt: Jy’s sjarmant en interessant.

Oppas hiervoor: Jy gebruik jou sjarme om mense te manipuleer en uit te buit. Jy waag kanse, soek opwinding en sukkel om bande met mense te onderhou.

Kleurryk

Jou sterk punt: Jy’s pret en sosiaal.

Oppas hiervoor: Jy’s melodramaties en soek die heeltyd aandag. Jy wil heeltyd raakgesien word, raak vinnig verveeld en sukkel om te fokus.

Verbeeldingryk

Jou sterk punt: Jy’s innoverend en onvoorspelbaar.

Oppas hiervoor: Jy tree vreemd en eksentriek op en is selfgesentreerd.

Ywerig

Jou sterk punt: Jy’s detailgeoriënteerd en werk hard.

Oppas hiervoor: Jy’s perfeksionisties en moeilik om tevrede te stel. Dit kan jou veeleisend maak. Jy wil ook alles self doen, eerder as om te delegeer.

Pligsgetrou

 

Jou sterk punt: Jy’s inskiklik.

Oppas hiervoor: Jy wil mense graag tevrede stel. Jy stem saam met alles wat vir jou gesê word en wil nie onafhanklik werk nie.

Bron: Hogan Assessment Systems en Lize Strauss

My sê tel: Hoe het jou sterk punte jou al laat ontspoor?