china
Wat eet ons vandag?

Iets ligs uit China

China is groot. Daar’s vrugbare grond, woestynagtige droëgrond en, gelukkig, ’n see wat gewillig is. Die klimaat wissel van die tropiese tot die toendra. Hoewel elke klein landstreek met ’n eie kookkuns spog, kan China in vier kosstreke verdeel word: suidelik, ooskus, wes-sentraal en noordelik, elk met ’n eie aard. Die Kantonese (suidelike) kookkuns is die een wat ons ook hier in Suid-Afrika leer ken het. ’n Ou gesegde lui dat die Kantonese enigiets met vier pote sal eet – behalwe ’n meubelstuk! Dun souse, subtiele geure en ’n ligte hand met speserye is kenmerkend. Varkvleis is die gewildste en rys die pasmaat by uitstek. Hul bydrae tot internasionale kookkuns? Roerbraai.

Aan die ooskus leef die mense van vis uit die see en uit riviere. Gebak en gesmoor. Dun rysmeelpap word hierby voorgesit. Die beste sojasous in China kom uit dié streek en is noodsaaklik vir die doopsouse waarin gebraaide visporsies gedoop word. Brandrissies, knoffel, uie en gemmer verleen ’n sterk geur aan die kos van die sentrale streek. Voeg hierby sesamolie en bonesmeer en die woord delikaat verdwyn summier. Vleis en omtrent alle ander kos word in diepvet (olie) bros gebraai. Die noordelike kookkuns word oorheers deur kopkool en geurmiddels is skraps en die vleis min. Tog is dit die tuiste van Peking-eend!

– PETER VELDSMAN

Spyskaart

(6 porsies)

Voorgereg

Garnale op roosterbrood

Varkvleis-spring rolls

Hoender-saté

Hoofgereg

Groente-noedel-roerbraai

Nagereg

Fortuinkoekies