VIA_FB_Inspirasiekos-pre
Kos

‘Inspirasiekos met SARIE’ se mossel- en oester-resep (episode 14)

Herman gaan see toe om mossels uit te haal saam met SJ Poggenpoel van Peperbaai in Saldanha. Terug op vaste grond maak Herman ’n roti-brood, mosselkerrie en ’n verfrissende oestergereg met ’n mango-salsa.

Roti-brood

Dis ’n Indiese brood en die woord beteken letterlik lagies gaar deeg.

1C3B0019

genoeg vir 12 

  • 250 ml water
  • 90 ml olyfolie
  • 5 ml sout
  • 460 g (1 000 ml) koekmeel, plus ekstra vir uitrol
  • 115 g (125 ml) botter, gesmelt

Verhit oond tot 220 °C. Plaas water, olie, sout in middelslag-mengbak. Roer met houtlepel terwyl jy meel geleidelik byvoeg totdat die deeg ’n stywe, kniebare vorm het.

Knie 5 – 8 minute op meelbestrooide werkvlak of tot deeg glad en elasties is. Plaas in skoon bak wat met olie gesmeer is en laat rus 30 minute op warm plek. Rol deeg op meelbestrooide werkvlak tot 3 mm dik uit. Verf hele stuk deeg met botter. Rol deeg op in ’n lang deegwors. Sny wors in 12 stukke.

Rol elke stuk in vry vorm uit op ’n meelbestrooide werkvlak tot sowat 3 mm dik. Verhit kleefvrye braaipan tot matig warm en braai brood met bietjie olyfolie tot goudbruin en gaar, sowat 5 minute per kant. Sit voor saam met lam.

Mosselkerrie

Mossels was nog nooit so fancy nie!

1C3B0060

genoeg vir 4

  • 45 ml olyfolie
  • 1 ui, fyngekap
  • 30 ml vinkelsaad
  • 30 ml rissievlokkies
  • 45 ml gerookte masala
  • 20 ml borrie
  • 2 lourierblare
  • 2 x 410 g-blikke klappermelk
  • 1 x 410 g-blik gekapte tamaties
  • 1 hand vol koljander, fyngekap
  • sout en varsgemaalde swartpeper
  • 1 kg mossels, skoongemaak

Verhit olyfolie in groot braaipan tot warm. Voeg ui, vinkelsaad en rissievlokkies by. Roerbraai vir 5 minute of tot uie begin verbruin – as dit lyk of die speserye begin brand, gooi ’n bietjie water by. Voeg res van speserye vir die sous by en roerbraai verder vir nog 5 minute of tot mengsel geurig is. Gooi klappermelk en tamaties by. Meng deur. Verlaag hitte en laat stadig prut vir 20 – 25 minute of tot dik, romerige sous vorm. Roer vars koljander deur. Geur goed met sout en peper. Gooi mossels by en maak pot toe. Laat kook vir nog 8 minute of totdat mosseldoppe oopgaan. Roer deur en sit voor.

Oesters met mango-salsa

Die soet tropiese smake is hemels saam met oesters.

1C3B0036

genoeg vir 10

  •  ½ rooi-ui, baie fyngekap
  • 1 rooi brandrissie, fyngekap
  • 1 vars mango, geskil en in blokkies gesny
  • pulp van 4 grenadellas
  • 1 hand vol vars  koljander fyngekap
  • sap en skil van 1 suurlemoen
  • 20 ml sjerrie-asyn (of witwynasyn)
  • 20 vars oesters

Meng al die bestanddele behalwe die oesters. Maak oester oop met oestermes en sny los van die dop. Plaas op opdienbord. Skep salsa bo-op en sit voor.

Nóg Inspirasiekos met SARIE-resepte

Sout | Wagyu | Koffie | Sampioene |

Eiers | SjokoladeHeuning | Kruie |

ForelJenewer | Aarbei | Waterblommetjie