Bykos

Gerookte springbok-carpaccio met knoffel-en-fetakaas-platbrood en soetrissie-kompot

(8 porsies)

  • 1 springbokfilet, gerook
  • 50 ml olyfolie
  • 50 ml balsemasyn

Plaas filet in die vrieskas tot ferm. Gebruik ’n elektriese snymasjien – of baie skerp mes – om die halfbevrore vleis in papierdun skyfies te sny. Besprinkel met olyfolie en balsemasyn.

Knoffel-en-fetakaas-platbrood

  • 10 ml aktiewe droë gis
  • 500 ml louwarm water
  • 60 ml olyfolie
  • 650 g (1 160 ml) koekmeel
  • 12,5 ml sout
  • 15 ml mieliemeel
  • 15 ml olyfolie, om bo-oor te smeer
  • 50 ml knoffel-puree
  • 250 g fetakaas, in stukke gebreek
  • vars roosmaryn

Los die gis in die water op en laat 10 minute staan. Roer olyfolie by. Meng die meel en sout. Hou 150 g van meelmengsel eenkant en vou res by die gismengsel in totdat die deeg sy vorm behou. Knie 10 minute lank op ’n oppervlak wat liggies met meel bestrooi is. Voeg nog van die meel by totdat die deeg elasties is. Vorm ’n bal met die deeg. Plaas in ’n bak wat liggies met olyfolie gesmeer is. Bedek met ’n klam doek en laat 1 uur op ’n warm plek rys, of totdat die volume verdubbel het. Knie deeg af. Smeer ’n bakplaat met olie en sprinkel mieliemeel oor. Rol deeg in ovaalvorm uit en plaas op bakplaat. Verhit oond tot 200 °C. Laat deeg weer 1 uur lank rys. Smeer olyfolie en knoffel-puree oor. Sprinkel fetakaas en roosmaryn oor. Bak vir 20 – 25 minute.

Soetrissie-kompot

  • 1 rooi soetrissie
  • 1 groen soetrissie
  • 1 geel soetrissie
  • 3 knoffelhuisies
  • 1 roosmaryn-takkie
  • sout en varsgemaalde swartpeper na smaak
  • 50 ml olyfolie
  • 100 ml balsemasyn

Verhit oond tot 200 °C. Plaas soetrissies, knoffel en roosmaryn op ’n bakplaat. Geur met sout en swartpeper. Sprinkel olyfolie oor. Rooster tot soetrissies swart verkleur. Haal uit en bedek vir 10 minute met foelie. Verwyder skil wanneer soetrissies afgekoel het en sny hulle in skyfies. Geur weer met sout en swartpeper. Marineer soetrissies in balsemasyn tot benodig.

Om te drink

Oranjerivier Wynkelders Chenin Blanc