Foto deur Lee Malan

SARIE KOS FEB/MAART 2013

Foto deur Lee Malan SARIE KOS FEB/MAART 2013

Gebak

Basiese glutenvrye brooddeeg

Die tekstuur van die deeg verskil van gewone brood sʼn omdat daar geen gluten in is nie. Knie die deeg in ʼn elektriese menger
(genoeg vir 1 groot brood)

  • 10 ml sout
  • 470 ml louwarm water
  • 45 ml heuning
  • 1 x 10 g sakkie kitsgis
  • 500 g (1 000 ml) glutenvrye meel
  • 255 g (500 ml) suiwer sorghummeel

Plaas sout, water, heuning en gis in ’n elektriese menger se bak. Gooi glutenvrye en sorghummeel by terwyl die menger loop tot ’n stywe, kniebare deeg vorm. Knie op medium spoed vir 8 minute of tot alles in een bal saamkom. Gooi ekstra sorghummeel by indien nodig. Plaas die deeg in ’n bak wat goed gesmeer is met olyfolie. Bedek bak met kleefplastiek en laat rys deeg sowat 45 – 60 minute op ’n warm plek tot dubbel in volume. Gebruik dié basiese deeg in al die resepte wat volg.

Wat jy moet weet van gluten
Vir die meeste van ons is koring, rog en gort en al hul koolhidrate en proteïene voedsaam en ’n uitstekende bron van energie. Tog is daar mense wat olik voel nadat hulle dit geëet het. Dit kan die gevolg wees van ’n glutenallergie, of van gluten-intoleransie (glutensensitiwiteit), want gluten is een van die proteïene in dié graansoorte.
Gluten-allergie en gluten-intoleransie is twee verskillende gesondheidsprobleme. Die eerste en belangrikste stap in die behandeling van albei is om gluten – en dus koring – te vermy. Maar omdat die algehele uitskakeling van koring en koringprodukte tot ’n vitamien B-tekort kan lei, is dit die beste om jou dokter te spreek om vas te stel of jy bykomende behandeling nodig het en om die regte vitamien B-aanvulling te neem.

Teks:
Marí Hudson, redakteur van The Good Doctors. Resepte nagegaan deur dieetkundige Amanda Weber, 011 646 8203.
[/box]