Foto deur Micky Hoyle SARIE KOS Augustus/September 2014

Gebak

Choux-deegring(Paris-brest)

Dié lekkerte vol dik vla is die eerste keer gemaak tydens ’n fietsren in 1910 tussen Parys en die dorpie Brest.

Genoeg vir 6
• 250 ml water
• 115 g (125 ml) botter
• 2 ml sout
• 250 ml rysmeel
• 50 g glutenvervanger
• 6 eiers

Vulsel
• 6 eiergele
• 45 g (90 ml) mielieblom
• 75 g (90 ml) strooisuiker
• 10 ml kitskoffie
• 600 ml melk
• 50 g gevlokte amandels
• 100 ml goue stroop

Verhit oond tot 180 °C. Plaas water, botter en sout in middelslag-pot en bring tot kookpunt met deksel op. Voeg rysmeel en glutenvervanger gelyk by en roer met ’n houtlepel tot alles in een bal saamkom. Roer nog 5 minute oor hitte. Verwyder pot van plaat en laat afkoel tot louwarm. Voeg eiers een-een by en roer goed ná elke byvoeging. Voer ’n bakplaat uit met bakpapier en trek 6 potloodsirkels met ’n deursnee van 10 cm op die papier. Draai papier om sodat potlood nie afgee op deeg nie. Skep deegmengsel in ’n spuitsak met ’n skerprand-tuit van 1 cm. Spuit deegsirkels op gemerkte plekke op papier. Spuit ’n sirkel van klontjies op elke soliede sirkel. Bak 12 – 15 minute of tot goudbruin en bros. Vulsel Klits eiergele, mielieblom, suiker en koffie saam tot lig en romerig in ’n mengbak. Bring melk tot kookpunt in ’n pot en voeg by eiermengsel. Meng. Gooi mengsel terug in pot en roer oor lae hitte tot dit verdik (soos witsous). Hou aan roer tot vlamengsel glad en gaar is, sowat 5 – 8 minute. Laat afkoel. Gebruik riffelrandmes en halveer gebakte choux-sirkels. Skep koue vla in spuitsak met 1 cm-skerprand-tuit. Spuit bietjie vla oor een helfte van die choux-sirkel. Plaas ander helfte bo-op. Herhaal met oorblywende sirkels en vla. Sprinkel amandels en stroop oor. Sit voor.