Foto's deur Donna Lewis

Foto's deur Donna Lewis

6 uur tuis, eet half 7

Maalvleispasteie

(2 PORSIES)
30 MINUTE

  • 45 ml olyfolie
  • 1 ui, fyngekap
  • 2 knoffelhuisies, gekap
  • 100 g spek, fyngekap
  • 200 g maalvleis
  • 200 g (½ blik) geblikte tamatie
  • 50 g bevrore ertjies
  • sout en varsgemaalde swartpeper
  • 1 hand vol vars koljander, gekap
  • 1 x 400 g-rol blaardeeg
  • 1 eier, liggies geklits

Verhit oond tot 200 °C en verhit olyfolie in mediumgroot pot. Voeg uie en knoffel by en braai liggies tot dit begin verbruin. Voeg spek en maalvleis by en braai nog 5 minute. Voeg tamatie by en verlaag hitte. Laat vinnig kook vir sowat 5 minute. Verwyder van hitte en roer ertjies en koljander by. Geur met sout en swartpeper. Verdeel blaardeeg in die lengte in twee repe. Verdeel vulsel tussen die twee. Skep dit op
die boonste helfte van die deeg en vou onderste helfte bo-oor. Gebruik die plat kant van ’n vurk en druk reg om die rand van die pastei sodat die twee lae deeg aan mekaar vassit. Plaas op ’n bakplaat wat gespuit is met kleefwerende sproei. Gebruik ‘n kwassie om die pasteie met die eier te verf. Bak vir 15 – 20 minute of tot goudbruin en gaar. Sit warm voor met slaai.