FOTO: Mickey Hoyle

FOTO: Mickey Hoyle

Gebak

Mooi, mooier, meringue

Meringue is soos kant. Delikaat en fyn. Soos ‘n vrou kant oor haar vel drapeer om haarself op te dress, om haarself ‘n bietjie meer beeldskoon en stylvol te maak, so trek jy kos aan met meringue om dit onweerstaanbaar te maak.

Ek het nog altyd die idee gehad dat koninklikes beslis elke aand meringue vir nagereg kry. Jy mag dalk redeneer dat dit nie naastenby duursaam genoeg is vir ‘n prinses nie, maar mooier as meringue kry jy mos nie.

Die wit fluweel skitter effens in die lig – ‘n digte kombers van proteïene wat lig reflekteer soos ‘n toegesneeude stad se liggies. ‘n Veerligte tekstuur, wat effens omkrul-vou wanner jy ‘n skeppie neem met jou vingerpunt.

Die pièce de résistancemoet egter wees wanneer jy die eerste happie meringue in jou mond sit. Dit neem ‘n paar sekondes vir die suiker om te begin smelt en ‘n soet room in jou mond te word wat jou laat vra vir nog.

Tog kom meringue nie altyd so stylvol uit nie. Soms maak jy per ongeluk floating islands met die water wat uitskei met eierwit-wolkies wat bo-op dryf.

Die huishulp Minnie Jackson in die fliek The Help som dit mooi op: A meringue is really nothing but a foam. And what is a foam after all, but a big collection of bubbles? And what’s a bubble? It’s basically a very flimsy little latticework of proteins draped with water. We add sugar to this structure, which strengthens it. But things can, and do, go wrong.

Dus, omdat ons weet dinge kan en sal een of ander tyd verkeerd gaan, is daar ‘n paar dinge om te onthou wanneer jy meringue maak!

Liezl se onthou-dinge

Wanneer jy meringue maak, onthou…

  • Maak seker dat die eierwitte altyd kamertemperatuur is. Wanneer jy dit direk uit die yskas gebruik, is die proteïene wat die lug moet vasvang te koud en kan dit nie genoeg rek nie. Dit sal ontaard in ‘n meringue wat sy volume verloor.
  • Klits eierwitte met ‘n knippie sout tot gewenste stadium (sagte- of stywepunt) voordat jy die suiker begin byvoeg.
  • Voeg suiker stadig by. Ek vind die beste manier is om die suiker teelepel vir teelepel by te voeg. Dit gee die suiker kans om weg te smelt voordat die volgende suiker bygevoeg word.

Stadiums van meringue

Sagte punte Sagtepunt-meringue krul effens om met ‘n punt wanneer jy jou klitser uithaal. Die meringue word gebruik vir bo-lae, soos dié vir terte.
Stywepunt-meringue se punte sal regop bly wanneer jy die klitser uithaal. Die meringue gebruik jy wanneer jy meringue moet invou by jou nagereg.

3 soorte meringue

Franse meringue Franse meringueDie meringue word in ‘n mengbak gemaak deur eierwitte te klits tot die verlangde stadium en dan suiker stadig by te voeg. Die meringue moet altyd gebak word omdat dit rou eier bevat.
Switserse meringue Switserse meringueDie meringue word net soos die Franse s’n gemaak, behalwe dat die eierwitte in ‘n mengbak oor ‘n pot kokende water geklits word, om die eier gaar te maak soos jy klits. Die meringue is meer stabiel en val nie so gou plat nie.
Italianse meringue Italiaanse meringueItaliaanse meringue word gemaak deur ‘n suikerstroop (125 ml water:250 ml suiker) in ‘n pot tot 121 °C te verhit. Terwyl die stroop warm word, klits jy die eierwitte tot die regte stadium. Wanneer stroop warm genoeg is, voeg jy dit in ‘n dun straal by die eierwitte terwyl jy dit op hoë spoed klits. Die eierwitte is dan klaar gaar en hoef nie gebak te word nie. Boonop sal die meringue ‘n hele dag of selfs langer hou sonder om plat te val. Die meringue se tekstuur is fyner en gladder as die ander.

Liezl se gunsteling SARIE-meringue-resepte

 Pavlova-roomyse
Grenadella-meringues
Individuele gebakte alaska
Meringue-kolwyntjies
Witsjokoloade-meringue-roulade

Gaan klits nou dadelik vir ‘n stylvolle meringue vir ‘n koninklike se nagereg!

Klits-en-klets-kok

Liezl