Gebak

Paaslam met kappertjiesaad-en-groen-kruie-vulsel

(8 porsies)

  • 1 groot lamsboud, ontbeen (2,7 – 3 kg)
  • 1 glas witwyn gemeng met dieselfde hoeveelheid water

Vulsel

  • 1 knoffelhuisie
  • 15 ml kappertjiesaad (capers)
  • 4 – 5 ansjovissies (die goeie soort, ingelê in olyfolie)
  • ’n bossie platblaarpietersielie, stele verwyder
  • 15 – 20 basiliekruidblare
  • blare van 4 takkies dragon (tarragon)
  • ’n bietjie mosterd, suiker en swartpeper na smaak
  • sap en skil van een suurlemoen
  • ’n goeie skeut olyfolie

Verhit jou oond tot 220 °C. Berei vulsel voor: Kap die knoffelhuisie fyn op ’n groot groenteplank, voeg die kappertjiesaad, ansjovis, pietersielie, basiliekruidblare en dragon by en kap alles saam fyn (’n mezzaluna werk goed). Skep in ’n mengbak en roer mosterd, suiker, suurlemoensap en -skil en swartpeper by. Gooi olyfolie by en meng tot ’n dikkerige pasta. Proe en pas smaak aan maar moenie sout byvoeg nie, want die kappertjiesaad en ansjovis sorg daarvoor. Smeer die vulsel oor die binne-oppervlak van die lamsboud. Rol boud op en bind stewig vas met kombuistou. Plaas in roosterpan en rooster vir 30 minute. Gooi die wyn-en-water oor die vleis en verlaag temperatuur tot 160 °C. Rooster ’n verdere 15 minute vir elke 500 g vleis, indien jy dit medium-gaar verkies. Skakel oond af en laat vleis in die oond afkoel vir 20 – 30 minute. Maak intussen die vleissous: Gooi die vleissappe uit die oondpan in ’n kastrol en kook af. Dit moet ’n lekker intense smaak hê. Sny die vleis in dun skywe en gooi die vleissous in ’n sousbeker. Sit vleis warm of teen kamertemperatuur voor met oondgebakte pampoenskywe en stampkoring.