sk08_2patats04
Gebak

Patat-gnocchi

(6 porsies)

  • 1 kg patats, heel
  • 750 g aartappels
  • 3 eiers
  • 100 g semolina
  • sout en varsgemaalde swartpeper
  • 1 ml fyn neutmuskaat
  • 100 g (180 ml) meel (vir jou werkoppervlak)

Plaas die patats op ’n bakplaat en sny ’n kruisie bo-op elkeen. Bak in ’n warm oond teen 200 °C tot gaar en sag. Kook die aartappels intussen tot sag. Dreineer en verwyder die skil. Druk die aartappels deur ’n aartappeldrukker fyn. Wanneer die patats gaar is, haal uit die oond en skep die sagte binnekant uit. Druk die patats nou baie fyn. Meng die fyn aartappels en patats in ’n groot mengbak en laat dit afkoel. Voeg die eiers by en meng goed. Voeg die semolina by en meng weer goed. Geur met sout en peper en neutmuskaat. Strooi die 100 g meel op jou werkoppervlak. Vorm die deeg nou in lang worse, sowat 2 cm dik, en sny in 3 cm-stukke. Druk elke stukkie effens plat met die agterkant van ’n vurk. Bring water en sowat 5 ml sout tot kookpunt in ’n groot kastrol. Maak die gnocchi (nie te veel op ’n slag nie) in die kookwater gaar. Wanneer hulle na die oppervlak kom, is hulle reg. Haal versigtig uit en hou warm. Kook só die res van die gnocchi. Sit voor met vars saliebotter.

Saliebotter

  • 180 g ongesoute botter
  • groot handvol vars salieblare
  • sout en varsgemaalde swartpeper
  • gerasperde parmesaankaas, om voor te sit

Smelt sowat 80 g van die ongesoute botter in ’n pan. Braai die salieblare tot lekker bros. Haal die gebraaide blare uit en dreineer op kombuispapier. Gooi die botter weg. Smelt die res van die botter en geur met sout en peper. Voeg die gebraaide salieblare by en skep ’n bietjie oor die gnocchi. Sit voor met gerasperde parmesaankaas.

 

Om te drink

Skink ’n glasie Zonnebloem Chardonnay. Die neut- en sitrusgeure in dié wyn sal beslis ’n wenner wees by die patat se soet smaak. Chardonnay se geurprofiel is kompleks genoeg om teen kruiegeure sy man te staan.