Foto deur Micky Hoyle
SARIE KOS JUNIE/JULIE 2013

Foto deur Micky Hoyle SARIE KOS JUNIE/JULIE 2013

Gebak

Pistasieneut-Pavlova

(Genoeg vir 6 – 8)

  • 4 eierwitte
  • knippie sout
  • 225 g (265 ml) strooisuiker
  • 5 ml mielieblom
  • 5 ml witwyn-asyn
  • 100 g pistasieneute sonder dop

Verhit oond tot 140 °C. Plaas eierwitte en sout in elektriese menger. Klits tot stywe-punt-stadium – sien kassie op web. Terwyl die eierwitte in die menger geklits word, voeg strooisuiker eetlepel vir eetlepel by. Wanneer die suiker op is, voeg mielieblom en asyn by. Klits tot net gemeng. Plaas pistasieneute in voedselverwerker en kap fyn. Vou in by meringue. Voer ’n bakplaat uit met bakpapier wat goed gespuit is met kleefwerende kossproei. Skep meringue op bakplaat in ’n groot sirkel. Plaas in oond vir 1 uur. Haal uit en laat afkoel. Haal versigtig af van bakplaat en sit op opdienbord. Onthou, die pavlova is nog taamlik sag aan die binnekant.

warm witsjokoladesous

  • 200 g witsjokolade
  • 250 ml room

Breek sjokolade in stukke. Plaas saam met room in ’n kastrol. Plaas op stoofplaat op lae hitte. Roer nou en dan tot sjokolade gesmelt is en sous warm is. Maak seker dat die sous nie kook nie.

Vir bo-op

  • vanieljeroomys
  • 100 g pistasieneute sonder dop

Skep groot balle roomys en plaas boop pavlova op opdienbord. Gooi warm sjokoladesous oor en sprinkel neute bo-op. Sit dadelik voor.