rolo-koekies

FOTO: Micky Hoyle SARIE KOS APRIL/MEI 2013

Gebak

VIDEO: Onweerstaanbare Rolo-koekies

Probeer jy nou “nee” sê vir een van dié koekies!

ʼn Foto het my oorreed om sulke koekies te probeer maak. En dis toe baie maklik – jy vou net ʼn Rolo-lekker toe in eenvoudige sjokoladekoekiedeeg, sê SARIE KOS se redakteur Barbara Joubert.

lewer sowat 25 koekies

  • 2 pakkies (50 g elk) Rolo-sjokolade
  • 140 g (150 ml) botter
  • 200 g (250 ml) bruinsuiker
  • 200 g (250 ml) witsuiker
  • 2 eiers
  • 30 ml melk
  • 5 ml vanieljegeursel
  • 100 g (250 ml) kakao
  • 350 g (625 ml) koekmeel
  • 5 ml bakpoeier
  • 1 ml sout
  • strooisuiker om koekies in te rol

Plaas Rolo’s minstens 1 uur voor gebruik in yskas. Verhit oond tot 180 °C. Plaas botter in elektriese menger se bak. Voeg suikers bietjies-bietjies by en verwerk tot lig en romerig. Klits eiers, melk en geursel saam. Voeg by bottermengsel en meng goed. Sif kakao, meel, bakpoeier en sout saam in mengbak. Voeg bietjies-bietjies by bottermengsel en meng goed tot deeg vorm. Skep ’n groot eetlepel vol deeg in jou hand. Druk een Rolo in die middel en maak goed toe met deeg. Vorm in ’n bal. Gooi strooisuiker op bord en rol koekie in suiker. Herhaal tot al die deeg op is. Plaas koekies so 2 cm uitmekaar op ’n uitgevoerde bakplaat en plaas in oond. Bak 12 – 15 minute tot koekies begin kraak. Haal uit en laat afkoel op afkoelrak.