Foto's deur Micky Hoyle

Pluimvee

Hoender-en-olyftagine

(4 porsies)

  • 30 ml olyfolie
  • 8 hoenderdye
  • 2 ui, gehalveer en in skywe gesny
  • 4 knoffelhuisies, fyngekap
  • 2 ml paprika
  • 5 ml fyn komyn
  • 5 ml fyn koljander
  • 1 ml fyn gemmer
  • 3 ml fyn kaneel
  • skil van 1 suurlemoen, in dik repe geskil met ‘n groenteskiller
  • sap van 1 suurlemoen
  • 100 g Italiaanse swart olywe
  • 100 g ontpitte groen olywe
  • sout en varsgemaalde swartpeper na smaak
  • hand vol vars koljander vir voorsit

Verhit olyfolie in tagine. Braai hoenderstukke tot net bruin. Voeg die res van bestanddele (buiten koljander) by en geur met sout en peper. Sit deksel op en stel die plaat se hitte op die laagste. Die stoom wat in die tagine vorm, sal vir die sous sorg. Laat kook vir minstens 2½ – 3 uur bo-op die stoof en probeer om nie die deksel op te lig nie. Ek weet dis moelik – jy kan maar so een of twee keer loer of als nog reg is. Sit voor met koeskoes en vars koljander.

Om te drink:
Simonsig Chenin Blanc

Om te weet: ‘n Tagine is ‘n Marokkaanse gereg wat vernoem is na die spesiale pot waarin dit gaargemaak word. Tradisioneel word ‘n tagine-pot heeltemal van klei gemaak. Dit bestaan uit twee dele – die basis, wat so 4 cm diep is, en ‘n deksel, wat soos ‘n horinkie in die basis pas. Die deksel is ontwerp om die kondensasie van die vloeistof weer op te vang.
Bron: Wikipedia