Pers-5228
Resepte

8-uur-lamskenkel-pasteie

Sondagmiddagete is sinoniem met samesyn. Begin vanaand voorberei en jy het môre die heerlikste gereg!

Maak dit stadig oornag gaar.

genoeg vir 6

  • 45 ml olyfolie
  • 6 groot (sowat 2 kg) lamskenkels
  • 2 uie, grofgekap
  • 4 knoffelhuisies, fyngekap
  • 30 ml fyn koljander
  • 30 ml vinkelsade
  • 1 x 200 g-buis tamatiepasta
  • 2 x 410 g-blik kersietamaties
  • 500 ml beesvleisaftreksel
  • 500 ml rooiwyn
  • sout en varsgemaalde swartpeper
  • 100 ml melk
  • 50 ml warm water
  • 150 g (165 ml) botter
  • 450 g (800 ml) koekmeel
  • 2 eiers

Saterdag: Verhit oond tot 100 °C. Verhit olie in middelslag-pot. Braai vleis in pot tot goudbruin, sowat 5 – 8 minute. Voeg uie, knoffel, koljander en vinkel by. Voeg tamaties, aftreksel en wyn by en geur met sout en swartpeper. Bak so 8 uur of oornag in warm oond tot vleis van been wegtrek.

Sondag: Skep skenkels uit sous en haal vleis van been af. Hou bene. Voeg van potsous by vleis en meng tot klam vulsel. Verhit oond tot 160 °C. Bring 50 ml melk, water en botter tot kookpunt. Plaas meel en 1 eier in voedselverwerker en meng by hoë spoed terwyl jy warm melkmengsel bygooi. Verwerk tot deegbal. Rol op meelbestrooide werkvlak uit tot so 3 mm dik. Sny 6 sirkels van 20 cm in deursnee uit met ’n koekiedrukker. Rol orige deeg weer tot 3 mm dik uit en sny sirkels van sowat 8 cm uit. Spuit 6 holtes van dubbelgroot muffinpan met kleefwerende kossproei en voer uit met groot deegsirkels. Verdeel vleismengsel tussen pasteie. Plaas ’n skoon skenkelbeen in middel van elk. Plaas kleiner deegsirkel bo-op en druk deur been.Seël rande met vurk. Klits orige melk en eier saam. Verf oor pasteie. Bak 20 – 25 minute of tot goudbruin.