Resepte

Barbara se Osso Bucco

  • 50 g botter
  • 1 groot ui, fyngekap
  • 4 wortels, fyngekap
  • 2 selderystokke, fyngekap
  • 2 huisies vars knoffel, fyngekap
  • 8 – 10 kalfskenkels, 6 cm dik gesny
  • sout en vars gemaalde swartpeper
  • na smaak
  • meel om skenkels in te rol
  • sowat 90 ml olyfolie
  • 500 ml droë wit wyn
  • 200 ml hoenderaftreksel
  • 10 ml droë basiliekruid
  • 10 ml droë tiemie
  • 2 blikke heel tamaties, gekap
  • hand vol fyngekapte pietersielie
  • 2 lourierblare

Gremolata

  • gerasperde skil van 2 suurlemoene
  • 3 huisies vars knoffel, fyngedruk
  • 2 hande vol fyngekapte pietersielie

Meng die suurlemoenskil, knoffel en pietersielie saam – dit is die vinnigste deel van die resep. Smelt die botter in ’n swaarboomkastrol groot genoeg om die skenkels te hou. Voeg die gekapte uie, wortel, seldery en knoffel by en braai oor lae hitte vir sowat 10 minute. As die oondplaat te warm is, sal die botter brand; wees dus versigtig. Bind die skenkels met ’n toutjie vas sodat dit mooi bymekaar bly wanneer dit oond toe gaan. Geur die kalfskenkels met sout en peper en rol in die meel. Skud die oorskiet-meel af. Verhit die olyfolie in ’n pan en braai die kalfskenkels tot bruin – net 3-4 op ’n keer. Dis nou waar die geduld inkom. Plaas die skenkels bo-op die gebraaide mengsel uie, wortel, knoffel en seldery. Voorverhit die oond tot 180° C. Giet die wyn in die pan waarin die skenkels gebraai is. Kook tot die helfte af. Voeg die hoenderaftreksel, basiliekruid, tiemie, tamatie, pietersielie en lourierblare by en bring tot kookpunt. Gooi oor die skenkels. Bring tot kookpunt bo-op die stoof. Plaas deksel op en sit bak in ’n voorverhitte oond vir sowat 2 uur. Die skenkels moet sag wees en die sous taamlik afgekook. As daar nog te veel sous na jou smaak is, laat die gereg sonder deksel in die oond bly tot die sous effens meer afgekook het. Sit voor saam met risotto (sien Kosdinge bl. 135) en strooi gremolata bo-oor.