sr0609sop06
Resepte

Beesstert-sop

Jy benodig

  • 500 g beesstert 
  • 30 ml sonneblomolie
  • 1 ui, gekap 
  • 2 wortels, in die lengte gehalveer en in skywe gesny
  • 1 groot selderystingel, in stukkies gesny 
  • 6 tamaties, in blokkies gesny 
  • 750 ml water 
  • 15 ml Worcestersous
  • 1 lourierblaar 
  • sout en varsgemaalde swartpeper na smaak

Verhit jou oond tot 140 °C. Plaas beesstert in ’n kastrol. Maak toe met deksel en plaas in die oond vir minstens 4 uur. Haal uit en laat afkoel. Verwyder vleis van die bene en verwyder oortollige stukke vet. Behou die bene. Verhit olie in ’n kastrol. Braai ui, wortels en seldery saam vir sowat 10 minute. Gooi tamaties by en braai verder vir sowat 5 minute. Gooi vleis, bene
en die jellie (wat vorm as die vleis afkoel) by. Voeg water, lourierblaar en Worcestersous by. Geur met sout en swartpeper. Maak kastrol toe met ’n deksel en laat stadig prut vir minstens 4 uur. Roer elke nou en dan. As jou sop te dik kook, kan jy nog ’n klein bietjie water byvoeg, maar onthou, dit moet lekker dik wees.

Beker-potbrood
(3 brode)

Jy benodig

  • 250 g witbroodmeel 
  • 250 g koekmeel 
  • 1 x 10 g-pakkie kitssuurdeeg
  • 15 ml suiker
  • 5 ml sout 
  • sowat 200 ml louwarm water

Verhit jou oond tot 180 °C. Meng witbroodmeel en koekmeel saam in ’n groot mengbak. Voeg suurdeeg, suiker en sout by. Maak ’n holte in die middel van die meel en voeg genoeg
louwarm water by om ’n stywe deeg te vorm. Knie die deeg goed vir minstens 10 minute en sit terug in die mengbak. Smeer ’n klein bietjie olie oor en maak toe met ’n lap. Laat op ’n warm plek tot dubbel die grootte rys. Knie deeg af. Verdeel dit in 3 stukke en plaas in gesmeerde emaljebekers. Smeer ’n klein bietjie olie oor en laat tot dubbel die grootte
rys. Plaas in die warm oond en bak vir 1 uur.

Om te drink
Boschendal 1685 Shiraz