Resepte

Helen Crouse (naaswenner) van Jeffreysbaai se tradisionele melktert-resep

Tradisionele melktert

Die deeg hou vir maande goed. Tradisioneel word ’n emaljebord gebruik.


Skilferkors

(genoeg vir 6 – 8 melktertkorse)

  • 500 g botter (baie koud)
  • 10 ml kremetart
  • 500 g koekmeel, ongesif afgemeet
  • 5 ml sout
  • 250 ml water
  • 25 ml wit asyn
  • 2 eiergele, ekstragroot

 

Sny ’n kwart van die yskoue botter af en strooi kremetart oor. Hou eenkant. Sif die meel en sout saam en rasper die res van die botter in die meelmengsel in. Meng goed met ’n deegsnyer. Klits die water, asyn en eiergele goed saam en meng dit met die meel-en- bottermengsel (die deeg kan slap wees). Verkoel die deeg in die vrieskas totdat dit styf en hanteerbaar genoeg is om uit te rol. Rol die deeg uit tot ongeveer 48 x 38 cm. Meng die botter en kremetart goed saam en smeer dit oor die uitgerolde deeg. Vou dit op soos tertdeeg en rol nog een keer uit. Voer ’n emaljebord van 26 cm daarmee uit en maak ’n 3 cm rand.

 

Vulsel

(genoeg vir 1 melktert)

  • 100 ml koekmeel
  • 15 ml mielieblom
  • 125 ml suiker, verdeel in 3 gelyke dele
  • 500 ml volroommelk  
  • 2 kassia- of kaneelstokkies2 ekstragroot eiers, geskei
  • 15 ml botter

Verhit jou oond tot 200 °C. Meng die koekmeel, mielieblom en ’n derde van die suiker met van die melk om ’n pasta te vorm. Kook die res van die melk saam met die kassia/kaneel en voeg dit by die meelmengsel. Meng goed en gooi deur ’n sif terug in die kastrol. Kook die mengsel tot dik. Meng die eiergele met nog ’n derde van die suiker en klits baie goed. Voeg die meelmengsel by die eiermengsel, asook die botter. Gooi terug in die kastrol en laat net opkook. Verwyder van die hitte. Klits die eierwitte met die laaste derde van die suiker styf en vou die meel-eiermengsel by die eierwitte in. Gooi in ’n ongebakte kors en bak vir 20 minute totdat die mengsel oprys.