sk08_3retro01
Resepte

Kreef Thermidor

(2 porsies)

  • 2 krewe
  • 250 ml groente-aftreksel
  • 30 ml witwyn
  • 2 salotte (shallots), fyngekap (of piekeluie as jy dit nie kry nie)
  • 10 ml pietersielie, fyngekap
  • 5 ml droë dragon (tarragon)
  • 110 g botter
  • 30 ml koekmeel
  • 5 ml droë mosterd
  • 250 ml melk
  • sout en varsgemaalde swartpeper na smaak
  • 60 g parmesaan-kaas, gerasper

Bring water in ’n groot kastrol tot kookpunt. Dompel die krewe daarin en kook vir 10 minute. Haal uit en laat afkoel. Sny die krewe in die lengte oop. Verwyder die vleis uit die stert-gedeelte. Was die res van die kreefdop mooi skoon uit en laat droog word. Sny die kreefvleis in groterige stukke. Gooi die groente-aftreksel, wyn, salotte, pietersielie en dragon in ’n kastrol. Bring tot kookpunt en kook tot die helfte van die vloeistof weggekook het. Gooi deur ’n sif. Smelt 60 g van die botter in ’n kastrol. Voeg die meel en mosterd by en roer tot ’n gladde pasta. Voeg die melk en aftrekselmengsel by en meng goed om seker te maak daar is geen klonte nie. Hou aan roer tot die sous verdik het. Geur met sout en swartpeper. Voeg die helfte van die parmesaan-kaas by en meng goed. Smelt die res van die botter in ’n pan en braai die kreefstukke vir so 2 minute. Plaas die kreefdoppe op ’n bakplaat en skep die helfte van die sous daarin. Skakel die rooster-element van jou oond aan. Skep die kreefvleis in die doppe en gooi die res van die sous oor. Sprinkel die oorblywende parmesaan-kaas oor en rooster onder die element tot mooi bruin (so 10 minute). Sit onmiddellik voor.

 

Om te drink
Egte Franse sjampanje! Met ’n platter beursie, kies Simonsig Kaapse Vonkel, SA se eerste cap classique-wyn.