sr0904paasfees06
Resepte

Lamskenkel-kerrie

(6 porsies)

  • sowat 50 ml olyfolie
  • 6 lamskenkels
  • sout en varsgemaalde swartpeper na smaak
  • 30 ml sonneblomolie
  • 3 uie, gekap
  • 1 blik gekapte tamaties
  • 10 ml fyn komyn
  • 10 ml fyn koljander
  • 4 kardemomsade
  • 10 ml fyn gemmer
  • 2 ml fyn kaneel
  • 4 knoffelhuisies, fyngekap
  • 30 ml suurlemoensap
  • 1 blik klappermelk
  • 10 ml masala
  • 10 ml borrie
  • 1 ml brandrissievlokkies
  • 250 ml water

Verhit jou oond tot 200 °C. Gooi die olyfolie in ’n groot oondroosterpan en plaas die lamskenkels daarin. (Die skenkels lyk soos klein lamsboude.) Geur hulle met sout en swartpeper. Plaas in die warm oond en rooster vir sowat 45 minute tot mooi bruin. Maak intussen die kerriesous: Verhit die sonneblomolie in ’n groot kastrol met ’n deksel wat jy in die oond kan sit. Braai die uie tot sag en deurskynend. Voeg die res van die bestanddele, behalwe die water, by. Laat prut vir so 10 minute. Verlaag die oondtemperatuur na 160 °C. Plaas die skenkels in die sous en voeg water by. Maak die kastrol toe en plaas in die oond vir sowat 2 uur. Die vleis moet heerlik sag wees. As die sous vir jou te veel lyk of nie dik genoeg na jou smaak is nie, haal die deksel vir die laaste halfuur af.

Wenk
As jy nie groot skenkels kan kry nie, kan jy dié kerrie ook met opgesnyde skenkels maak. Rooster dit dan net vir so 25 minute in die oond.

Sit voor saam met
Geelrys en rosyntjies, gestoofde perskes, piesangs in jogurt, komkommer en mango-atjar.