skm1005wild.pastei
Resepte

Springbokpastei met slapdeeg-kors

8 – 10 porsies

• 1 springbokboud, sowat 2,5kg
• 40ml olyfolie
• 1 ui, fyngekap
• 400g gerookte spek, in blokkies gesny
• 40ml bruinasyn
• 2 lourierblare
• 8 heel naeltjies
• 500ml water
• sout en swartpeper

Sny die been uit die boud – dit maak dinge net makliker as jy vleis fynkook. Sny vleis in groot stukke. Verhit olie in ‘n groot kastrol. Braai ui en spek saam vir so 10 minute. Maak seker die ui word nie bruin nie. Voeg vleis by en braai vir nog so 10 minute. Voeg asyn, lourierblare, naeltjies en water by. Geur met sout en swartpeper. Sit ‘n deksel op en verlaag die hitte sodat die vleis stadig prut vir sowat 4 uur, waarna dit uitmekaar sal val. Maak nou die vleis los met ‘n vurk. Proe of die vulsel nog sout en peper kort. Daar moet nog heelwat sous wees, anders bak jou vulsel droog. Skep vulsel in ‘n oondvaste bak. (As dié hoeveelheid vir 10 mense te veel is, vries die helfte vir nog ‘n pastei. Kyk in die kassie regs bo watter grootte jy wil maak.) Verhit jou oond tot 180°C. Maak die beslag en skep op die vulsel. Bak vir 30 minute tot goudbruin.

Slapdeeg vir Pastei…wat jy moet weet.

Vir ‘n ronde bak van sowat 20 x 10cm met die helfte van die resep links se vleisvulsel
6 porsies

• 1 eier
• 125ml melk
• 125ml sonneblomolie
• 120g (215 ml) koekmeel
• 10ml bakpoeier
• 1ml sout

Vir ‘n langwerpige bak van sowat 30 x 18cm met die hele vulsel
10 porsies

• 2 eiers
• 250ml melk
• 250ml sonneblomolie
• 240g (430ml) koekmeel
• 20ml bakpoeier
• 2ml sout

1. Klits eier, melk en olie saam.

2. Meng meel, bakpoeier en sout in ‘n mengbak. Voeg die eiermengsel by en klits goed totdat daar geen klonte is nie.

3. Skep die beslag oor die vleis.

V&A Vries dit

Hoe lank kan ek my heel springbokboud vries?
Verkieslik nie vir langer as 8 – 12 maande nie. Daarna kan die vleis baie droog word.

Gerookte spek vir stop
Vra jou slagter vir spek wat jy self kan opsny, of gebruik repiespek (streaky bacon).

En bykosse?
Soetpatats is perfek by die boud en pastei. Daar’s ‘n heerlike resep op sarie.com. Klik op kos en wyn>sarie, kos> resepte>bykos en tik “soetpatats” in die soekblokkie.

Wat van ‘n jellie?
As jy soos ek in die Karoo grootgeword het, ken jy appelof kweperjellie saam met wildsvleis. Supermarkte het baie nuwe geure, soos bosbessie-jellie (“cranberry”).

Veelsydig
Gaar wildsvleis kan weer gebruik word vir allerlei geregte, bv. ‘n heerlike pastei van fyngekookte oorskietboud.

  • Annatjie Koekemoer

    Springbokpastei met slapdeeg-kors

    Baie jare gelede het ek al hierdie resep iewers gekry en die degie vir net mooi alle pasteie wat ek wou maak gebruik en elke keer is ek net komplimenteer oor my heerlike pasteie.

    Gebruik gerus gaar ontbeende hoender met speserye soos hoender, vars gerasperperde neut, sout en peper, bietjie fyngekapte pietersielie, gaar wortel en aartappel blokkies en een gebraaide ui. Meng al die bestandele liggies saam en skep dit in vuurvaste bak. Skep die deeg oor die vleismengsel en bak teen 180F grade f tot die korsie mooi bruin is.

    Ek belowe jou jy sal baie, baie komplimente kry!

    Groete

  • Annemie

    watter wyn sal perfek met die springbok pastei gaan?