Appel-en-kaaspastei

Deur Barbara Joubert, SARIE KOS Lente 2009

Appel-en-kaaspastei Foto’s: Micky Hoyle Galery

As kind was my gunsteling ’n lekker sterk stuk cheddarkaas saam met ’n groen appel. Dis ’n kombinasie wat wonderlik werk in ’n pastei.

4 pasteie

Deeg

  • 60 g sagte botter
  • 1 eier
  • 80 ml suurroom
  • 140 g (250 ml) koekmeel
  • 5 ml bakpoeier
  • knippie sout

Vulsel

  • 2 groen appels
  • 100 g gruyère-kaas, fyngerasper

Krummel-laag

  • 30 ml koekmeel
  • 20 ml botter

Verhit oond tot 160 °C. Plaas al die bestanddele vir deeg in jou voedselverwerker. Meng tot glad. (Moenie bekommerd wees nie, die deeg is nie styf soos wanneer jy dit gaan uitrol nie.) Skep deeg in goedgesmeerde, groot muffinpanne van sowat 250 ml in volume. Smeer deeg met die agterkant van ’n lepel teen die kante van die pannetjies op. Ontklok appels, maar hou skil aan. Sny in baie dun ringe. Plaas een ring onderin elke pannetjie en sprinkel ’n bietjie kaas oor. Herhaal tot bo. Vir die krummel-laag, vryf die meel in die botter in tot dit soos broodkrummels lyk. Sprinkel bo-op elke tertjie en bak vir 30 – 35 minute tot gaar. Druk ’n dun pennetjie aan die kant in en maak seker dit kom droog uit. Haal uit en laat so 10 – 15 minute rus voordat jy dit uitkeer.

  • Assistent Lynnae Janse van Rensburg

Verwante artikels