Bobotie-blokkies

Deur Barbara Joubert, SARIE KOS - Lente 2008

Bobotie-blokkies Foto’s: Micky Hoyle Galery

Gewoonlik word bobotie warm saam met rys bedien, maar ek het dit in klein blokkies gesny en by kamertemperatuur saam met blatjang voorgesit

(8 - 10 porsies)

  • 2 snye bruinbrood
  • 250 ml melk
  • 30 ml sonneblomolie
  • 2 uie, in skywe gesny
  • 15 ml fyn appelkooskonfyt
  • 15 ml kerriepoeier
  • 5 ml borrie
  • 1 kg maalvleis
  • 30 ml bruinasyn
  • 10 ml sout
  • varsgemaalde swartpeper na smaak
  • 2 eiers
  • 250 ml karringmelk
  • lourierblare

Verhit jou oond tot 180 ºC. Week die bruinbrood in die melk. Verhit die sonneblomolie in ’n pan en braai die uie tot sag en bruin. Voeg die appelkooskonfyt, kerriepoeier en borrie by. Braai vir sowat drie minute. Meng die geweekte brood, vleis, uiemengsel en bruinasyn goed in ’n bak. Geur met sout en swartpeper. Sit die vleismengsel in ’n oondbak van 30 x 100 cm. Klits die eiers en karringmelk saam en gooi oor die vleis. Bak vir sowat 45 minute. Haal uit en sny in blokkies. Vir garnering kan jy ’n vars lourierblaar in elke blokkie druk. Sit by kamertemperatuur voor met blatjang.

  • Assistent Lynnae Janse van Rensburg

Verwante artikels