Boontjiesop en volkoringbrood

Deur Barbara Joubert, SARIE - Junie 2009

Boontjiesop en volkoringbrood Foto’s: Micky Hoyle Galery

In die Junie-uitgawe (nou te koop) is daar vier van Barbara se beste warm soppe en brode. Hier's twee bonus-resepte spesiaal vir die winter

(6 porsies)

Jy benodig
• 50 ml olyfolie
• 1 ui, fyngekap
• 1 knoffelhuisie, fyngekap
• 1 wortel, in klein blokkies gesny
• 1 selderystingel, in skywe gesny
• 2 aartappels, in klein blokkies gesny
• 400 g gerookte varktjops (kassler-ribs), in blokkies gesny, van die been af
• 3 blikke botterbone (400 g elk)
• 800 ml hoender-aftreksel
• 1 lourierblaar
• sout en varsgemaalde swartpeper na smaak

Verhit olyfolie in ’n kastrol. Braai ui en knoffel tot sag en deurskynend. Voeg wortel, seldery en aartappel by en braai verder vir sowat 5 minute. Gooi gerookte varkvleis by en braai vir nog 10 minute. Voeg bone, aftreksel en lourierblaar by. Geur met sout en swartpeper en laat kook vir 35 minute. Onthou om elke nou en dan te roer. Sit voor saam met volkoringbrood.

Om te drink
Brampton Cabernet Sauvignon

Volkoring-gesondheidsbrood
Werklik baie maklik om te maak: Gooi alles in ’n bak en meng. (Maak een 18 x 8 cm-brood of 2 medium- of 3 baie klein broodjies.)

Jy benodig
• 125 ml spysverteringsemels
• 125 ml sonneblomsaad
• 375 ml volkoringmeel
• 250 ml koekmeel
• 10 ml heuning
• 10 ml bruinsuiker
• 5 ml koeksoda
• 3 ml sout
• 500 ml karringmelk

Verhit jou oond tot 180 °C. Meng al die bestanddele saam, behalwe die karringmelk. Voeg dan karringmelk by. Jy moet alles goed meng en die beslag moet taamlik klam wees. Gooi beslag in ’n gesmeerde broodpan van 18 cm x 8 cm (of ander groottes, soos verkies). Strooi ’n bietjie sonneblomsaad oor.

Wenke
• As jy een brood bak, bak dit vir 1 – 1 ½ uur tot gaar.
• Laat 45 minute – 1 uur toe vir die medium-brode.
• Sowat 35 minute vir die kleintjies.
• Toets met ’n toetspen om seker te maak dis gaar.

  • Assistent Lynnae Janse van Rensburg

Verwante artikels

  • Cowboy-boontjies

    Cowboy-boontjies

    SARIE KOS vir mans 2010

    Hierdie gereg is regtig vullend. Niemand sal honger gaan slaap nie!

  • Franse bruin-uie-sop

    Franse bruin-uie-sop

    SARIE Julie 2010

    Seker een van die goedkoopste soppe, maar ook een van die lekkerste!

  • Koue beetsop

    Koue beetsop

    SARIE KOS Somer 2009/10

    'n Koue sop vir die somer is altyd verfrissend.

  • Volkoringbrood

    Volkoringbrood

    SARIE KOS April/Mei 2011

    Om jou eie brood te bak is glad nie moeilik nie - veral dié resep is gooi-alsbymekaar- en-meng.