Frikkadelle met tamatie-en-uiesmoor

Deur Barbara Joubert, SARIE KOS - Winter 2008

Frikkadelle met tamatie-en-uiesmoor Foto’s: Micky Hoyle Galery

30 minute - 4 porsies (sowat 8 groot frikkadelle)

  • 3 snye bruinbrood
  • 500 g beesmaalvleis
  • 500 g varkmaalvleis
  • 100 ml Worcestersous
  • 1 ui, fyngekap
  • 1 eier
  • sout en varsgemaalde swartpeper na smaak

Tamatie-en-uiesmoor

  • 30 ml olyfolie
  • 1 ui, fyngekap
  • 1 knoffelhuisie, fyngekap
  • 1 blik (400 g) gekapte tamaties
  • 5 ml droë gemengde kruie
  • sout en varsgemaalde swartpeper na smaak
  • 50 g pecorino-kaas, gerasper

Verhit jou oond tot 220 °C. Plaas die brood in ’n bak en gooi warm water oor tot net bedek. Laat week vir so 1 minuut. Gooi die oortollige water af, maar moenie water uit die brood druk nie. Meng die brood, die twee maalvleise, Worcestersous, ui en eier goed saam in ’n mengbak. Geur met sout en swartpeper. Vorm die frikkadelle en plaas in ’n oondbak. Bak die frikkadelle in ’n mikrogolfoond (op hoog gestel) vir 10 minute. Verhit intussen die olyfolie in ’n pan. Braai die ui en knoffel vir so 2 minute. Voeg die tamaties en gemengde kruie by. Geur met sout en swartpeper en kook sonder ’n deksel vir 10 minute tot lekker dik. Gooi die smoor oor die frikkadelle en plaas in die warm oond vir nog 10 minute. Sit voor met die pecorino-kaas en ’n groenslaai.

  • Assistent Lynnae Janse van Rensburg

Verwante artikels