Geskroeide beesfilet-slaai met ’n bloubessie-sous

Deur Herman Lensing, SARIE Januarie 2010

Geskroeide beesfilet-slaai met ’n bloubessie-sous Foto’s: Donna Lewis Galery

Die sous kan sommer ook ’n marinade word. Die suiker in die bessies sal karamelliseer en die vleis ekstra lekker laat smaak!

4 porsies

  • ½ ui, fyngekap
  • 100 g bloubessies (vars of bevrore)
  • 15 ml suiker
  • 5 ml sout
  • 80 ml wit balsemasyn
  • 130 ml olyfolie
  • 400 g beesfilet
  • 1 pak (70 g) slaaiblare van jou keuse
  • sout en varsgemaalde swartpeper

Meng ui, bloubessies, suiker, sout en asyn saam in ’n medium-groot kastrol. Bring tot kookpunt en laat prut vir 5 minute. Voeg 120 ml olyfolie by en meng in ’n voedselverwerker tot ’n gladde puree. Verhit ’n riffelpan tot baie warm en gooi oorblywende olyfolie daarin. Geur filet met sout en peper.

Braai in die warm pan vir sowat 8 minute aan elke kant tot medium-gaar of langer soos jy verkies. Laat rus die gaar filet vir 5 minute voor jy dit met ’n skerp mes in dun repies sny. Verdeel slaaiblare en filet tussen borde. Skep bessiesous oor en geur goed met sout en peper.

Wenk
As jy die sous as ’n marinade wil gebruik, verdubbel jou olyfolie om dit vloeibaar te maak.

  • Assistent Lynnae Janse van Rensburg, Elsabé Dippenaar

Verwante artikels