Lamsboud-pasta

Deur Herman Lensing, SARIE KOS Junie/Julie 2011

Lamsboud-pasta Foto’s: Donna Lewis Galery

Rooster jou lamsboud oornag tot sag en gebruik dit om ’n geurige vleissous te maak.

(6 – 8 PORSIES)

  • 45 ml olyfolie
  • 600 g lamsboud (ontbeen)
  • 6 knoffelhuisies
  • 500 g baba-uie
  • 200 g tamatiepasta
  • 1 x 400 g-blik tamaties
  • 250 ml beesvleisaftreksel
  • 750 ml rooiwyn
  • 4 takkies roosmaryn
  • 1 hand vol tiemie
  • sout en varsgemaalde swartpeper
  • 1 x basiese pasta-resep
  • 100 g broodmeel vir uitrol
  • 350 g crème fraîche

Verhit oond tot 140 ºC. Verhit olyfolie tot warm in medium-groot pot. Gebruik ’n skerp mes en druk 6
gate in die lamsboud. Druk knoffel in gate. Braai lamsboud in warm olie tot goudbruin. Voeg uie by en
braai 5 minute of tot bruin. Voeg tamatiepasta, blik tamatie, aftreksel en rooiwyn by. Bring tot kookpunt.
Voeg kruie by. Maak pot toe en bak in oond vir 8 ure of oornag. Laat afkoel en vlok vleis. Voeg van pot
se sous by vleis en bring tot kookpunt. Laat stadig prut vir 10 minute. Geur met sout en peper. Terwyl sous prut, gebruik jy ’n pastamasjien om die deeg met meel uit te rol tot nommer 2 of sowat 1 mm dik met ’n koekroller. Gebruik ’n skerp mes en sny pastavelle in repe van 2 cm breed. Bring pot met water tot kookpunt en gooi pasta in water. Kook vir 5 – 8 minute of tot pasta sag en gaar is. Dreineer en voeg by warm vleissous. Sit voor met crème fraîche. Jy kan ook 500 g gekoopte pasta van jou keuse saam met die sous voorsit.

  • Assistent Melissa Pecoraro en Jana van Sittert

Verwante artikels

Kommentaar