Nicoise-slaai op my manier

Deur Herman Lensing, SARIE KOS Augustus / September 2011

Nicoise-slaai op my manier Foto’s: Donna Lewis Galery

Tradisioneel word die slaai nie met slaaiblare gemaak nie, maar ek hou van die ekstra smaak.

(4– 6 PORSIES)
20 MINUTE

  • 500 g baba-aartappels
  • 180 g groenbone
  • 6 eiers
  • 60 ml olyfolie
  • 2 knoffelhuisies, gekap
  • sap en skil van 1 suurlemoen
  • 150 g slaaiblare van jou keuse
  • 1 rooi-ui, grofgekap
  • 2 x 170 g-blikke tuna, gedreineer
  • sout en varsgemaalde swartpeper

Plaas aartappels in pot water en kook sowat 10 – 12 minute oor matige hitte tot sag en gaar. Dreineer. Bring terwyl die aartappels kook nog ’n pot met water tot kookpunt en sit groenbone daarin. Laat vinnig kook vir 2 minute en dreineer dadelik. Hou eenkant. Bring weer ’n pot met water tot kookpunt en sit eiers versigtig in die water. Laat kook vir 5 minute vir sagte eiers, of langer soos jy verkies. Dreineer en dop eiers af. Meng olyfolie, knoffel, sap en skil van suurlemoen vir die slaaisous. Sit slaaiblare in opdienbak. Halveer gaar aartappels en plaas bo-op slaai saam met groenbone. Halveer eiers en rangskik bo-op, gevolg deur gekapte rooiui en tuna-stukke. Sprinkel slaaisous bo-oor. Geur goed met sout en peper en sit voor.

  • Assistent Jana van Sittert

Verwante artikels

Kommentaar