Olyf-en-uietert

Deur Herman Lensing

Foto’s: Donna Lewis Galery

BIZERCA BISTRO IS EEN VAN DIE KAAP SE GEWILDSTE EETPLEKKE. Hier kook die Fransman Laurent en sy Pretoriase vrou, Cyrillia van der Merwe, reeds drie en ’n half jaar lank ’n hond uit ’n bos, vandat hulle terug is uit Australië. Bizerca is bekend vir eenvoudige kos met ’n sterk Franse invloed.

Laurent glo die geheim van Franse kos is baie botter, veral as jy uie braai. En hy kook net met plaasbotter.
(2 PORSIES)

2 uie, geskil
30 g botter
30 ml vars tiemie, gekap
1 lourierblaar
400 g-rol blaardeeg (puff pastry), ontdooi in yskas
100 g swart olywe, ontpit
4 ansjovis-filette
150 g slaaiblare van jou keuse
2 grasuie, fyngekap
hand vol parmesaan-skaafsels
sout en varsgemaalde swartpeper
geklitste eier om oor deeg te verf

1. Verhit oond tot 220 °C. Gebruik ’n skerp mes en sny uie middeldeur en dan in dun ringe. Hou eenkant. Werk versigtig sodat jy jouself nie raaksny nie.

2. Verhit botter tot warm in ’n mediumgroot braaipan. Voeg die uie, tiemie en lourierblaar by. Verlaag hitte en roerbraai vir 8 – 10 minute of tot uie sag en gekarameliseer is. Hou eenkant.

3. Rol deeg uit en sny in twee vierkante van 12 x 12 cm. Plaas op bakplaat uitgevoer met bakpapier en bespuit met kleefwerende sproei. Gebruik punt van mes en maak ’n dun snytjie 1 cm van deeg se rand af, maar nie heeltemal deur die deeg nie. Prik die res van die middelste gedeelte met ’n vurk. (Dit maak dat net die rand van die tert rys.) Verf liggies met eiermengsel. Bak 15 – 20 minute of tot goudbruin en gaar.

4. Die geheim is om die uie lank en stadig te braai, want dit bring al die smaak uit. Onthou om die lourierblaar te verwyder wanneer jy die uie in die tertjies skep. Verwyder deeg uit oond en skep gaar uie in. Verdeel olywe en ansjovis tussen tertjies. Geur goed met sout en swartpeper. Plaas terug in oond en bak vir nog 5 minute. Sit warm tertjies dadelik met slaai, grasuie en parmesaanskaafsels voor.

Verwante artikels

Botterskorsie-en-sampioen tert

SARIE KOS Junie/Julie 2011

Dis perfek om in te pak werk toe vir môre semiddagete.
Fillo-tert met botterskorsie en feta

SARIE KOS Augustus / September 2011
Patat-tertjies

SARIE - Mei 2010

Nie heeltemal soet nie, maar ook nie eintlik sout nie.
Sampioen-bokmelkkaas-en-spektertjies

SARIE - Januarie 2011

30 minute
Spinasie-tertjies

SARIE KOS Somer 2009/10

Lekker vir middagete. 6 porsies
Vou-tert met uie, chorizo en sampioene

SARIE KOS Augustus / September 2011