Pannekoek met forel

Deur Barbara Joubert, SARIE KOS Lente 2009

Pannekoek met forel Foto’s: Micky Hoyle Galery

Hierdie voupakkies (wraps) is baie lekker as skemerkelkie-happies. Gebruik ’n pannetjie van 14 cm groot vir handgrootte pannekoeke.

sowat 20 klein pannekoekies

Pannekoek-beslag

  • 140 g (250 ml) koekmeel
  • 5 ml bakpoeier
  • 1 ml sout
  • 1 eier
  • 125 ml melk
  • 125 ml water
  • 7 ml suurlemoensap
  • 125 ml sonneblomolie
  • vars kerweltakkies (chervil)
  • sonneblomolie, ompannekoekies in te braai

Sif meel, bakpoeier en sout saam in ’n mengbak. Klits eier, melk, water, suurlemoensap en olie saam. Voeg eiermengsel by droë bestanddele en klits goed om klonte te voorkom. Verhit ’n klein bietjie olie in ’n pan en vee dit uit met kombuispapier. Skep ’n bietjie van die beslag in die pan en draai dit rond sodat beslag die panbodem bedek. Plaas klein stukkies kerwel op die pannekoekie sodra borrels vorm. Maak seker dis al effens bruin onder voordat jy dit omdraai. Draai om en braai aan ander kant tot gaar. Haal uit en herhaal proses met nog beslag. Die pannekoekies moet afkoel voordat jy hulle vul.

Vulsel

  • 500 g roomkaas
  • 4 grasuie (chives), fyngekap
  • sout en varsgemaalde swartpeper na smaak
  • 400 g gerookte forel

Meng roomkaas en grasuie goed. Geur met sout en swartpeper. Om die pannekoekies te rol, plaas een op ’n vel kleefplastiek. Smeer die pannekoek met roomkaas en plaas ’n stuk gerookte forel bo-op. Vou toe en rol styf toe met die kleefplastiek. Herhaal met die ander. Hou toe totdat jy dit voorsit.

Om te drink
Houtverouderde chardonnay. Die wyngeure sal goed pas by die gerookte geure van die forel.

  • Assistent Lynnae Janse van Rensburg

Verwante artikels