Rooiwyn-risotto

Deur Barbara Joubert, SARIE KOS - Herfs 2008

Rooiwyn-risotto Foto’s: Micky Hoyle Galery

Dis ideaal vir koue aande voor die kaggel. Hou altyd 'n lekker glas rooiwyn byderhand.

(4 - 6 porsies)

  • 15 ml botter
  • 15 ml olyfolie
  • 1 rooi-ui, fyngekap
  • 2 knoffelhuisies, fyngekap
  • 2 chorizo-worse, in blokkies gesny
  • 300 g (375 ml) arborio-rys
  • 250 ml rooiwyn
  • sowat 1,5 liter hoenderaftreksel
  • 1 blik (400 g) rooi bone, gedreineer en afgespoel
  • sout en varsgemaalde swartpeper
  • 100 g pecorinokaas, gerasper
  • handvol pietersielie, fyngekap

Verhit die botter en olyfolie saam in ’n kastrol. Braai die ui en knoffel tot sag en deurskynend. Voeg die chorizo-blokkies by en braai vir 2 minute. Voeg die rys by en braai vir nog 2 minute. Nou kom die rooiwyn by - kook dit af. Onthou om aanhoudend te roer. Voeg die hoenderaftreksel soplepel vir soplepel by. Ná elke byvoeging moet die aftreksel amper wegkook, maar nie heeltemal nie. Ná sowat 15 minute hiervan kom die bone by. Hou aan aftreksel byvoeg tot die rys na jou smaak reg is. Geur met sout en peper. Voeg die pecorinokaas en pietersielie by. Sit dadelik voor.

 

Om te drink

Chorizo is 'n Spaanse wors met 'n effense byt, en verg 'n wyn met genoeg skop sodat die robuuste geure nie die wyn oorweldig nie. 'n Tipiese Spaanse kultivar soos tempranillo is 'n goeie keuse. Die Krans maak 'n heerlike een. As jy sukkel om tempranillo in die hande te kry, probeer gerus Allesverloren Tinta Barocca.

  • Assistent Lynnae Janse van Rensburg

Verwante artikels