Terrien met gerookte forel en avokadopeer

Deur Barbara Joubert, SARIE - Desember 2006

Terrien met gerookte forel en avokadopeer Foto’s: Micky Hoyle Galery

Dié terrien - my ma se gunsteling - het ons altyd Kersfees gekry.

Genoeg vir 10 mense

Forel-laag

  • 300 g gerookte forel
  • 500 g roomkaas
  • 125 ml room
  • 15 ml suurlemoensap
  • 10 g gelatien
  • sout en vars gemaalde swartpeper na smaak

Avokadopeer-laag

  • 2 avokadopere
  • 500 g roomkaas
  • sap van ½ suurlemoen
  • 10 g gelatien
  • sout en vars gemaalde swartpeper na smaak
  • roket, kersietamaties en kappertjiesaad (capers) vir versiering

Voer ’n broodpannetjie uit met kleefplastiek. Gebruik sowat 100 g van die gerookte forel om die pan uit te voer. (Dit maak nie saak as jy meer moet gebruik nie.) Week die gelatien in koue water. Wanneer die gelatien ferm is, plaas die bakkie oor kookwater om dit te smelt. Kap die res van die gerookte forel fyn in jou voedselverwerker. Voeg die roomkaas, room en suurlemoensap by. Meng goed. Geur met sout en swartpeper. Voeg die gesmelte gelatien by en meng goed. Plaas die hele mengsel in die broodpan en maak die avokadopeerlaag. (Smelt die gelatien op dieselfde manier.) Maak die avokadopere fyn in jou voedselverwerker en voeg die roomkaas en suurlemoensap by. Geur met sout en swartpeper. Voeg die gelatien by en meng goed. Plaas nou dié mengsel bo-op die forel-mengsel. Bedek die pannetjie met kleefplastiek en laat stol in die yskas. Versier jou borde met roket, kersietamaties en kappertjiesaad net voor jy die gereg voorsit. Keer die terrien uit en sny in skywe - en geniet!

Verwante artikels