FOTO: verskaf

FOTO: verskaf

Boeke

Kinderboeke vir die langnaweek

Dis langnaweek en die kinders het baie tyd om te lees. Of jy kan ook vir jou kinders voorlees as hulle nog nie self die woorde kan herken nie.

storiemuis boek2StorieMuis, Leon Rousseau (Human & Rousseau, R170)
Leon Rousseau het in ’n onderhoud met SARIE.com gesê dat een van die dinge wat hom fassineer ’n jonk kind se enorme leervermoë is en dat as die leerproses reg aangebied word, dit vir die kind nie ’n plig is nie, maar ’n plesier. Rousseau se groot passie was om die reeks Storiemuis-boeke heruit te gee. “In sy oorspronklike gedaante het StorieMuis agt jaar ná StorieMan begin verskyn, en het ten spyte van vele herdrukke nooit so bekend geword soos StorieMan nie. Ouers was egter oor die opvoedkundige waarde van StorieMuis nog meer geesdriftig as as oor dié van StorieMan.” Tans is daar reeds drie van die boeke heruitgegee. Elke boek behandel ’n groot verskeidenheid opvoedkundige temas en word vergesel deur ’n oudio-CD met voorlesings en liedjies. Die reeks is gemik op kinders van 2 – 5 jaar. Dis propvol stories, liedjies en rympies. Kinders leer ook om syfers en die letters van die alfabet te herken. Dis ’n heerlike interaktiewe reeks boekies waardeur kinders speel-speel leer. Rousseau is op 24 Februarie 2016 oorlede. Hy sal altyd onthou word vir sy enorme bydrae tot die Afrikaanse kinder- en jeugliteratuur.

FOTO: verskaf

FOTO: verskaf

FOTO: verskaf

FOTO: verskaf

Nicholas and the Wild Ones, Niki Daly (Jacana, R120)
Niki Daly is ’n bekroonde skrywer en illustreerder van kinderboeke. Vir baie kinders is die blote gedagte aan skool toe gaan ’n nagmerrie. Nie omdat hulle nie van skool hou nie, maar eerder omdat hulle deur boelies geteister word by die skool. Vir baie kinders is boeliery ’n werklikheid en in hierdie boek raak Daly dié onderwerp aan. Nicholas word by die skool gekonfronteer deur ’n bende wilde kinders en hy vertel sy ma wat elkeen van hierdie kinders doen. Elkeen boelie die kinders op die speelgrond op ’n ander manier. Die vraag is hoe Nicholas hierdie wilde kinders se optrede gaan hanteer? Gaan hy terugbaklei, of gaan hy met ’n sagte woord probeer om die aanslag af te weer? Of hoe gemaak? Daly gee nie al die oplossings van hoe om boeliery te hanteer nie, maar daar is tog waarde in hierdie verhaal. Dit raak dié onderwerp aan en so kan kinders reeds blootgestel word aan moontlike maniere van hoe om boeliery te hanteer. Hulle sal wel iets leer uit Nicholas se verhaal. Die boek sal ook later beskikbaar wees in Afrikaans, Zoeloe en Xhosa. In Afrikaans is dit beskikbaar as Werner en die Wildewragtigs.

FOTO: verskaf

FOTO: verskaf

 

FOTO: verskaf

FOTO: verskaf

Die eerste Stadshaan, Claudia Eicker-Harris, illustrasies deur Juan Carlos Federico (Struik Kinders, R80)
In die oulike kinderboek kry Kloupoot, die haan, te doene met die wrede werkliheid van verstedeliking. Eens op ’n tyd was hy die enigste dier wat baie vroeg wakker geword het. Een nag word hy uit sy slaap gewek deur vreemde geluide, nie die normale diere- en plaasgeluide wat hy ken nie. Sy wêreld is besig om verlore te gaan, want dis die geluid van motors en vragmotors op die paaie wat die plaas waarop hy woon, omring. Dis genoeg motivering vir hom om ’n ander plaas te soek, ’n groot een waar die stad nie besig is om dit te verswelg nie. Maar eers moet hy ’n plaasvervanger soek wat die huismense soggens kan wakker maak. Hy hou oudisies tot groot vermaak van al die diere. Wat ’n gesukkel, want nie een van die voëls kry dit reg om die huismense met gesag te wek nie. Totdat Hanna die hadeda tot Kloupoot se redding kom. “En tot vandag word die inwoners van Suid-Afrika wakker met ’n geskater . . . die lag van die Hadeda, dié stadshaan.” Die kleurvolle kinderboek met sy vermaaklike storie sal ’n gunsteling word by kinders.

FOTO: verskaf

FOTO: verskaf

My kat, die mees verspotte kat ter wêreld, Gilles Bachelet (Protea Boekhuis, R130)
Ek is absoluut versot op hierdie boek en sy maatjie, Nuus oor my kat, wat briljant uit Frans vertaal is deur Nicol Stassen. Daar is ’n derde boek, Toe my kat nog klein was. Die groot aantrekkingskrag vir my lê in hoe die stories uitgebeeld word in prentjies. Die illustrasies veroorsaak al die pret met hierdie boeke. As jy die storie lees, klink dit soos ’n gewone storie oor ’n gewone kat. Totdat jy na die pragtige prentjies kyk! Die kat is eintlik ’n olifant wat homself verbeel hy is ’n kat. Ek is oortuig daarvan dat hierdie boekies kinders eindeloos sal vermaak. Die boek is gemik op kinders van 4 – 8 jaar. Lekker vir voorlees, maar die teks is groot en duidelik sodat jonger kinders wat al kan lees, sal die storie self kan volg.

FOTO: verskaf

FOTO: verskaf

FOTO: verskaf

FOTO: verskaf

Olinosters op die dak, Marita van der Vyver (Tafelberg, R130)
’n Heerlike humoristiese slaaptyd-storie oor Daniël wat by sy grootouers kuier en dan bed toe moet gaan. Maar, o wee, nes hy dink hy slaap, dan skrik hy vir iets. Ouma en Oupa se hulp word ingeroep om te help met die nare ‘ietse’. Daniël gee elke keer vir die ‘iets’ ’n ander naam soos olinosters, ’n krokokoei, ’n blouwildekameel en ’n bobberilla. Uiteindelik kom hy tog tot ruste ná al sy vrese besweer is en hy rustig met ’n regte kat en ’n teddiebeer die nag kan aandurf. Die verhaal is die eerste keer in 1996 uitgegee, met illustrasies deur Piet Grobler. Hierdie heruitgawe van Marita van der Vyver se kinderboek is pragtig deur Dale Blankenaar geïllustreer.

baba se dagMy boekhuisie: Baba se dag, Brenda Apsley (Human & Rousseau, R139,95)
Daar is twee boekies in die reeks, Op die plaas. Elkeen van die boekhuisies bevat vier klein boekies wat van harde karton gemaak is. Elke bladsy het ’n prentjie op met een woord wat dit beskryf. Baba se dag bestaan uit vier boekies: badtyd, etenstyd, slaaptyd en speeltyd.Die slaaptyd-boekie bestaan uit bed, kussing, horlosie, nagklere, boek, lamp, stoel, kameelperd, bewertjie, teddie, gordyn, robot, tandeborsel en pantoffels. Die boekies is daarop gemik om peuters se woordeskat te help uitbrei en help ook vroeë leesvaardigheid aan. Op die plaas volg dieselfde formaat.

FOTO: verskaf

FOTO: verskaf

FOTO: verskaf

FOTO: verskaf

Daar’s ’n beer in my boek, Emma Chichester Clark (Lapa Uitgewers, R109,99)
Dié Britse kinderboekskrywer en illustreerder se boek is deur Jaco Jacobs in Afrikaans vertaal. Die storie gaan oor die groot grysbeer, Bertus, wat nie juis beerdinge wil doen nie. Nee, hy wil ander dinge doen, soos om te leer lees. Wanneer hy ’n boek onder ’n boom ontdek, gaan hy op ’n soektog na die eienaar. So begin Bertus se groot avontuur. Kleuterfiksie op sy beste! Heerlik om voor te lees of vir ouer kinders om self te lees.

 

FOTO: verskaf

FOTO: verskaf

Pieter Kokkewieter en die hart op sy mou, Milan Murray (Murray & Me, R120)
Dis die eerste boek in ’n reeks oor idiome wat uit Murray se pen verskyn. Die boek is gemik op kinders van 6 – 9 jaar. Pieter Kokkewieter is ’n gewone seuntjie wat gewone goed gedoen het, buiten dat hy sy hart op sy mou gedra het – letterlik. Daarom het almal altyd geweet in watter bui hy was, want hulle kon dit aan sy hart sien. Maar is dit goed vir hom om sy hart so op sy mou te dra? Pieter Kokkewieter word geboelie en hy ervaar die intense teleurstelling daarvan. Dit het sy hart gebreek. Die verhaal gaan verder om dan te vertel hoe Pieter Kokkewieter uiteindelik weer leer om te vertrou, en dat dit okei is om sy hart op sy mou te dra. ’n Mooi verhaal met ’n leersame boodskap wat pragtig geïllustreer is deur Marisa du Toit.