Zanne Stapelberg deel haar oorsese dagboek - Deel 1

Deur Zanne Stapelberg, SARIE September 2010

Zanne Stapelberg deel haar oorsese dagboek - Deel 1 Foto’s: Nick Aldridge Galery

Die SA sopraan Zanne Stapelberg was onlangs oorsee vir sang-meestersklasse in Lugano, Switserland. Sy deel haar (skreeusnaakse) dagboek met sarie.com.

18 Julie

Die klasse is in Italiaans. Almal praat Italiaans. Nog nooit was ek so spyt dat ek nie net vervlaks Italiaans behoorlik geleer het nie. Het gisteraand na 'n verbysterende tromboonkwartet geluister. Italiaanse pellies gemaak - "I'm easy"-Ambra en Laetitia-kieriebeentjies. Gister die dorp verken. O, asembenemend mooi. Soos iets uit 'n erg kunserige kunsfliek.

Die meer wat letterlik flonker. Dis lig tot halftien, ag man, dis soos die Waterfront op acid. Greyton en Kaapstad gekruis. Plein op plein tussen pragtig geplaveide kronkelstraatjies. En oral buite restaurante wat oorloop van mense. Ek is oortuig die liewe Here het 'n vakansiehuis in Lugano. My huismaats is twee Hello Kitty-Japanesies, Ayko en Liza. Te dierbaar.
Ons koshuis is 'n halfuur se loop van die konservatorium af (uitroepteken). Almal is vreeslik beïndruk wanneer hulle hoor ek is van SA.

Oe, hoe lus kry ek nou vir soesji. Anders as toe ek 13 was en ons vir niemand mag gesê het ons is Suid-Afrikaners, met die 1990-Europese kinderkoortoer nie. (En nou hoor ek hulle het die wêreld-koorkompetisie in China gewen (inlas, 16 Augustus). Hierdie sit ek nou en skryf in die meestersklas waarvan ek nie 'n woord verstaan nie. Dammit, Zanne.

Die maestra is besig om wondere te verrig met, wat ek gedink het soos 'n leggero klink, wat gedink het sy is 'n mezzo, en toe blyk dit 'n lyrico te wees na net 'n paar tegniese toetsies.

Ek't so pas my eerste les gehad. O, baie lig gewerp op dinge wat die stem so mooi gaan afrond.

*Lees elke dag vir die volgende paar dae uit Zanne se oorsese dagboek

 

Verwante artikels

Kommentaar

Web Development by FormFunction