Hieroor praat mense

Fiela: Terug na Dalene se geliefde Bos

Fiela se kind begin Dinsdag by die Emperors Palace in Gauteng landwyd toer as verhoogproduksie. Shaleen Surtie-Richards is weer Fiela Komoetie, die karakter wat sy in 1988 in die fliekweergawe vertolk het.

Hoor wat Shaleen oor die ervaring amper 30 jaar later sê hiér.

Die verhaal, gegrond op wyle Dalene Matthee se beroemde gelyknamige boek, handel oor ’n vrou wie se vondelingkind, Benjamin, van haar weggeneem word. ’n Deel van die storie speel af in die Knysnabos, waarvoor Dalene ’n ontsaglike liefde gehad het. Ook haar drie ander “bosboeke” – Kringe in ’n bos, Moerbeibos en Toorbos – het hier afgespeel.

FOTO B-you Photography – Rina Gertzen

In die Fiela-fliek het Dalene selfs ’n klein rol as bosbewoner gehad. “Daar is nie ’n mens so slim soos die Bos nie,” het Dalene in 2003 in ’n onderhoud met SARIE gesê. “Jy kan altyd net van die Bos gaan leer.”

Dié bos en sy diere het gelukkig die verwoestende brande die afgelope week in Knysna en omgewing vrygespring, berig Netwerk24. Die brande het verlede Woensdag ontstaan.


Annie Malan, destyds die boskind Nina van Rooyen in die fliek, het ons vertel van haar hartseer oor die brande. “Ek is devastated. Ek het reeds ’n paar goed gedoen om mense te help. Hemel, ek is hartseer vir die mense. Soveel strukture, lewens [is verwoes], en dan die troeteldiere …”

Annie sal altyd met goeie herinneringe terugdink aan haar rol as Nina met die wilde bos hare. Haar karakter het so in mense se hart gekruip dat mense daarna dikwels ’n kind met deurmekaar hare “Nina die boskind” genoem het.

Een toneel was veral moeilik, vertel Annie: waar haar houtkapper-pa, Elias van Rooyen, haar hare afsny. “My hare is regtig afgesny, en ek het regtig gehuil,” sê sy. “Katinka [Heyns, regisseur] het vir my ná daardie toneel ’n groot pienk teddiebeer gegee en gesê dis my Oscar.

“Die fliek was ’n betowerende ervaring. Ek het regtig in feetjies geglo nadat ek so lank in daardie bos verfilm het.”

Kyk uittreksels van Fiela se kind hiér:

Het jy geweet?
1. Die boek Fiela se kind is in Engels, Frans, Sweeds, Sloweens, Nederlands, Hebreeus en Duits vertaal.
2. Fiela se kind is al op die verhoog as ’n drama, opera én musiekblyspel aangebied.
3. In 2007 was Fiela se kind een van drie Afrikaanse boeke wat Exclusive Books se lys, 101 Books to Read before You Die, gehaal het.
4. In ’n landwye peiling in 1999 deur 350 biblioteke is Fiela se kind as die Afrikaanse boek van die eeu aangewys.
5. In die fliek het Simon Barnard, Katinka Heyns se seun, die rol van Benjamin as jong seun gespeel. Jan Ellis was die ouer Benjamin. En Dawid Minnaar het die volwasser Benjamin gespeel.

Bron: www.dalenematthee.com