mei05kuberkuier1a
Reise

E-pos uit Parys, Frankryk

VERTEL MEER OOR JOUSELF. My pa, Leo, is ’n diplomaat, en ek is dus van jongs af bloot gestel aan ander kulture, wat seker my waardering vir kos en tale gekweek het. My ma, Renée, eintlik ’n joernalis, moes baie onthaal en is ’n gourmet – my eerste kontak met die onthaalbedryf. Ná skool het ek by my ouers in Parys gaan woon vir die “afjaar” voordat ek sou teruggaan universiteit toe. Ek het eers by Satoer in Parys gewerk, wat my vir die gasvryheidsbedryf lus gemaak het. Daarna is ek na ’n klein hotel in Ierland (Clifden) en het in al die afdelings gewerk – behalwe die kombuis! My ma stel toe voor ek volg ’n goeie kookkursus sodat ek nooit weer ’n bed hoef op te maak nie. Ek is na die Cordon Bleu-skool in die stad vir ’n basiese kursus van drie maande. Die koeël was deur die kerk.

HOE LOOP JOU PAD IN DIE KOSBEDRYF?
In Frankryk moet ’n mens ná enige kursus praktiese werk sonder betaling doen. Ek het by ’n sjiek Frans-Japannese restaurant (Shozan) gaan werk. Dit was ’n besonderse ondervinding. Daarna moes ek werk soek en is na die Association des Cuisiniers de France, wat in voeling met die hele bedryf is. Só het ek by die vierster-hotel (daar is nie vyf sterre in Frankryk nie) Le Meridien Montparnasse (1 000 kamers!) werk gekry, maar moes eers deur die nagmerrie van Franse burokrasie gaan. Dit het my máánde geneem om ’n permit te kry. Ek het in die hoofkombuis begin, wat buffet-etes en kamerdiens behartig en gereeld buffet-etes vir tot 2000 mense aanbied. Die sjef van die Montparnasse ’25, die hotel se Michelin-ster-restaurant, het my ná ’n jaar gevra om deel van sy span van ses te wees. Dit was ’n groot kompliment en deeglike, maar harde leerskool.

EN TOE BEDANK JY EN BELAND BY DIE RITZ! Jip, ek wou nie uit die kombuiswêreld wees nie, maar was lus vir meer mense-kontak. Ek het by die Ritz ingeloop, my CV ingelewer met die oog op tolkwerk en gehoop vir die beste. ’n Pos is vir my geskep! Ek is nou persoonlike assistent van die Directeur des Cuisines (hoofsjef) met my eie kantoortjie in die geskiedkundige kombuis, wat deur Escoffier, die koning van kos, self begin is. Dis ’n absolute droomwerk. Coco Chanel, wat jare in die Ritz gewoon het, het gesê: Le Ritz, c’est ma maison (die Ritz is my huis). Baie van ons wat hier werk, voel ook so. Ek vertaal spyskaarte, kyk na inkomende voorraad, werk skofte van die personeel uit (64 mense in die kombuis, bakkery en patisserie) en dan help ek in die kombuis met bankette en as krisisse opduik. Ons moes onlangs vir die Koning van Marokko se verjaardagparty kos berei – wat toe per vliegtuig na Rabat geneem is!

BAIE BEROEMDES BEDIEN? By die Meridien het ek ’n paar keer vir Bill Gates ’n kaasburger gemaak (ja, dis al wat hy eet!). By Shozan vir Johnny Depp (my held) en sy vrou, Vanessa Paradis, bedien. Franse akteurs soos Charlotte Gainsbourg. By die Ritz is Nicole Kidman ’n gereelde gas (sy eet net blare) en haar eks, Tom Cruise (hy eet net frambose). Die eienaar, Mohammed al Fayed, laat al sy etes voorberei by sy kasteeltjie aflewer.

JY WOON IN ‘N ROMANTIESE DAKWOONSTEL MET JOU KAT … Ek word soggens wakker in my dakwoonstel naby Saint Sulpice (die een van die Da Vinci Code) en ek sien die Eiffeltoring en die goue koepel van Les Invalides. Die Saint Germain-buurt, waar ek woon, wemel van internasionale studente en kunstenaars en daar is altyd iets aan die gang, soos musiekkonserte en tentoonstellings. Saans draf ek in die Luxembourg-tuin en neem soms vir Maurice, my Franse Siamese kat, vir uitstappies soontoe.

VERTEL MEER OOR DIE PARYSENAARS? Dis nie maklik om in die Paryse gemeenskap aanvaar te word nie, al praat ’n mens hóé goed Frans. Dit het my ’n paar jaar geneem om gemaklik en tuis te voel. Maar as jy aanvaar is en gewoond is aan die ritme van Parys, is dit moeilik om daar weg te kom.

IS DIE GRAS DAAR GROENER? My raad aan ander in hierdie global village is om oral te probeer werk. Dit het niks met ’n mens se gevoel vir jou eie land te doen nie. Te midde van al die deftige eetplekke en uitstekende kos verlang ek soms so na lekker pap en braaivleis.

GUNSTELING-GEREG OM TE BEREI? Ek kan ure aan ’n goeie sous bestee. ’n Eenvoudige gereg met ’n ingewikkelde sous.