Rubrieke - André le Roux

13 Dinge (wat jy nooit vir ‘n vrou moet sê nie)

Een: “Hei! Jou G-string steek uit.” Dis te erg, maak of jy nie sien nie, want jy weet nie of dit aspris uitsteek of per ongeluk nie. Soos hulle in Namakwaland sê: ’n G-string is nes weerlig – jy kyk nie na hom nie, maar jy sien hom.

Twee (in geen bepaalde volgorde nie …): “Vir ’n vet vrou sweet jy darem min.”

Dis die klassieke een. Jy’t dit dalk as ’n kompliment bedoel, maar jy’t haar tot in elke greintjie selluliet beledig terwyl jy gedink het dis nogal snaaks. Dis nie soos mens vriende maak nie.

Drie: “O, ek sien jy het ook selluliet.” Jy’t dit dalk as troos bedoel dat sy nie alleen hoef te voel nie, maar gewig, o, gewig. Bly liewer weg, selfs al voeg jy vinnig by: “Dit voel so lekker sag.”

As jy iets oor gewig móét opmerk, let op jou stemtoon en moenie jou woorde kies met gewigtigheid nie.As jy sê (nommer Vier): “Ek sien jy’t BAIE gewig verloor” gaan sy dink jy bedoel eintlik sy was dus ’n OS voor sy die “BAIE” gewig verloor het. Sê eerder iets soos: “O, maar jy het darem mooi gewig verloor. Jy lyk fantásties!” (Hou jou stemtoon laag, maar beklemtoon fantásties!)Swangerskap? Jy sê blymoedig: “Geluk! Ek sien jy’s weer swanger.” Dan is sy nie.

(Nommer Vyf.) Of jy vra, wat jy dink ’n heel onskuldige vraag is: “En wanneer kom die baba?” Dan kom die antwoord sissend: “Die baba is al vier weke oud!”

Met gepaste simpatie begaan jy nommer Ses: “Foei tog, jy lyk so moeggg.” Wat sy hoor, is nie wat jy gesê het nie. Sy hoor: “Foei tog, jy lyk darem sleg.” Onmiddellik dink sy: Oe! my make-up sit nie reg nie, daar’s seker kringe onder my oë. Sy gaan dadelik spieël toe om ondersoek in te stel en haar lipstiffie op te top.

Sewe is ’n stekelrige een: “Is dit nie weer ’n slag tyd om jou beenhare te skeer nie?”

“Ek kry nie eens tyd om my make-up behoorlik aan te sit nie! Wie dink jy moet sorg dat alles gedoen kom in hierdie huis? Waar het ek tyd vir myself terwyl jy lekker voor die TV sit en … ek wéns jy wil daardie remote neersit!”

En versigtig maar vir die hare. Sy’t haar hare laat sny en jy sien dit dadelik raak (tien punte vir jou). “Jou hare lyk so mooi.” (Nog tien punte.) “Dit pas jou.”

Skielik, daar gaan al jou punte (nommer Agt), want beteken dit haar hare het haar voorheen nie gepas nie?

Die ergste is as sy die dag haar hare laat sny en jy sien dit nié raak nie …

As jy dit wel raaksien en vra, omdat jy gedink het julle kan eerlik wees met mekaar (“Sê my eerlik wat jy dink”), trap jy in nommer Nege: “Wat het jy met jou hare aangevang?” Onthou, ’n vrou sal altyd verkies dat jy lieg oor haar hare. Dit kan haar ouer laat lyk.

Tien: “Is jy nou maar eers 35?!”

Asseblief, man, dínk tog voor jy praat! Enigeen – en sy heel eerste – kan mos sien jy’t gedink sy lyk ouer as 35. Dis net so goed jy sê vir haar: “Ek sien jy’t dieselfde skoene aan as gister.” (Nommer Elf.)

Dis verskriklik. Dis erger as wanneer julle by ’n geleentheid opdaag en daar’s ’n ander vrou met dieselfde rok aan as sy. Hulle bly die hele aand in die verste (verskillende) uithoeke van die vertrek. Nog erger: As hulle verskillende uitrustings aanhet, maar van dieselfde materiaal …

Twaalf: “Het jy gesien daai vrou het dieselfde rok aan as jy?” Meneer, asseblief, sy het! sy het! Jy moes gemaak het of jy dit nie ook raaksien nie. Die res van die aand gaan jou skuld wees … sy klink nes haar ma.

Dertien: “Jy klink nes jou ma.” Sy’t vanselfsprekend iets gedoen of gesê wat jou aan haar ma herinner het. En sy kan dadelik sien dis nie ’n aangename herinnering nie: “O, ja, nè? En wat PRESIESSS bedoel jy daarméé?” terwyl haar stem opgaan (nes haar ma s’n).

“Pssst,” onderbreek jy haar. “Moenie nou kyk nie, maar jou G-string steek uit …”

“Ek wéét,” pssst sy terug. “Dis asprisss net vir jou …”

PS: 13 dinge wat jy nie vir ’n vrou moet sê nie … Vir ’n man is daar net een: “Ekskuus dat ek lag.”